डिसेंबर महिना संपायला फक्त १६ दिवस शिल्लक राहीले आहेत. यापैकी जवळपास १० दिवस देशातील विविध भागात बँका बंद राहाणार आहेत. आज आणि उद्या देशभरात बँक कर्मचारी संपावर आहेत. अशाच सर्वसामान्य लोकांना बँकांशी संबंधीत कामकाज करताना अडचणीला सामोरे जावे लागू शकते.
याबाबत एका अहवालानुसार, विविध सरकारी बँकांतील जवळपास नऊ लाख कर्मचारी सार्वजनिक क्षेत्रातील दोन बँकांच्या खासगीकरणाच्या सरकारच्या निर्णयाविरोधात आंदोलन करीत आहेत. भारतीय स्टेट बँकेसह विविध बँकांनी आपल्या ग्राहकांना चेक क्लिअरन्स आणि फंड ट्रान्सफर सारख्या बँकिंगशी संबंधीत कामावर परिणाम होईल असा इशारा दिला आहे.
अखिल भारतीय बँक अधिकारी महासंघाच्या (एआयबीओसी) महासचिव सौम्या दत्ता यांनी सांगितले की, बुधवारी अतिरिक्त मुख्य कामगार आयुक्तांसोबतची बैठक निष्फळ ठरली. त्यामुळे बँक कर्मचारी संघटना आंदोलन करीत आहेत. देशभरात आज आणि शुक्रवारी बँका बंद राहतील. याशिवाय १९ डिसेंबर रोजी बँका रविवारमुळे बंद राहतील.