દેશમાં ચાલુ ખાંડની સિઝનમાં તેના ઉત્પાદનમાં ઘટાડો જોવા મળી રહ્યો છે. 15 જાન્યુઆરી સુધી ખાંડના ઉત્પાદનમાં 7 ટકાનો ઘટાડો થયો હતો અને આ સમય સુધીમાં તેનું ઉત્પાદન ચાલુ સિઝનના ઉત્પાદન અંદાજના અડધાની નજીક પહોંચી ગયું છે. મહારાષ્ટ્ર 51 લાખ ટનના ઉત્પાદન સાથે ખાંડના ઉત્પાદનની દ્રષ્ટિએ અગ્રેસર રાજ્ય છે.
નેશનલ ફેડરેશન ઓફ કોઓપરેટિવ શુગર ફેક્ટરીઝ (NFCSF)ના ડેટા અનુસાર, ચાલુ ખાંડની સિઝન 2023-24માં ઓક્ટોબરથી 15 જાન્યુઆરી સુધીમાં 148.70 લાખ ટન ખાંડનું ઉત્પાદન થયું છે,જે અગાઉના સમાન સમયગાળામાં 160 લાખ ટનના ઉત્પાદન કરતાં 7.06 ટકા ઓછું છે.
આ સિઝનમાં સરેરાશ રિકવરી 9.51 ટકા હતી, જે ગયા વર્ષના સમાન સમયગાળા દરમિયાન 9.52 ટકાની સરેરાશ રિકવરી કરતાં સહેજ ઓછી છે. આ સિઝનમાં અત્યાર સુધીમાં 509 મિલોમાં 1,563 લાખ ટન શેરડીનું પિલાણ કરવામાં આવ્યું છે, જ્યારે અગાઉના સમાન સમયગાળામાં 519 શુગર મિલોમાં 1,681 લાખ ટન શેરડીનું પિલાણ કરવામાં આવ્યું હતું.
2023-24ની સિઝનમાં ખાંડનું ઉત્પાદન 305.50 લાખ ટન રહેવાનો અંદાજ છે, જે ગત સિઝનમાં 330.90 લાખ ટન કરતાં ઓછો છે. આ સિઝનમાં અત્યાર સુધીમાં 148.70 લાખ ટનનું ઉત્પાદન થયું છે. સ્વાભાવિક છે કે આ સિઝનમાં અત્યાર સુધીમાં ખાંડના ઉત્પાદનનો આંકડો ઉત્પાદન અંદાજ કરતાં લગભગ અડધા સુધી પહોંચી ગયો છે.
મહારાષ્ટ્રમાં સૌથી વધુ ઉત્પાદન થયું
NFCSF અનુસાર, 15 જાન્યુઆરી સુધીમાં ઉત્પાદિત 148.70 લાખ ટનમાંથી સૌથી વધુ 51 લાખ ટનનું ઉત્પાદન મહારાષ્ટ્રમાં થયું છે. ઉત્તર પ્રદેશ 46.10 લાખ ટન ઉત્પાદન સાથે બીજા ક્રમે છે. આ પછી કર્ણાટકમાં 31 લાખ ટન, ગુજરાતમાં 4.70 લાખ ટન અને બિહારમાં 3.35 લાખ ટન ખાંડનું ઉત્પાદન થયું છે. મહારાષ્ટ્રમાં 197 શુગર મિલોમાં સૌથી વધુ 548.39 લાખ ટન શેરડીનું પિલાણ થયું હતું. રિકવરીના મામલામાં ઉત્તર પ્રદેશ મહારાષ્ટ્ર કરતાં આગળ છે.
ઉત્તર પ્રદેશમાં સરેરાશ રિકવરી 9.90 ટકા છે, જ્યારે મહારાષ્ટ્રમાં તે 9.30 ટકા છે. મહારાષ્ટ્રમાં આ સિઝનમાં 90 લાખ ટન ખાંડનું ઉત્પાદન થવાનો અંદાજ છે અને 15 જાન્યુઆરી સુધી આ અંદાજના અડધાથી વધુ ઉત્પાદન થઈ ચૂક્યું છે. ઉત્તર પ્રદેશમાં આ સિઝનમાં અત્યાર સુધીમાં 115 લાખ ટનના અંદાજિત ઉત્પાદન માંથી માત્ર 40 ટકા જ ઉત્પાદન થયું છે.
