કેન્દ્રીય નાગરિક ઉડ્ડયન પ્રધાન જ્યોતિરાદિત્ય સિંધિયાએ સોમવારે રાજ્યસભામાં માહિતી આપી હતી કે, તમામ આંતરરાષ્ટ્રીય પેસેન્જર ફ્લાઇટ્સની સેવાઓ 27 માર્ચ સુધી ફરી શરૂ થશે.
એક મહિનાના અંતરાલ પછી બજેટ સત્રના બીજા ભાગ માટે ઉપલા ગૃહની બેઠક મળી ત્યારે મંત્રીએ પ્રશ્નકાળ દરમિયાન આ જાહેરાત કરી હતી.
સિંધિયાએ કહ્યું, “તમામ નિયમિત આંતરરાષ્ટ્રીય ફ્લાઇટ્સ 27 માર્ચ સુધી 100 ટકા ક્ષમતા સાથે કામ કરશે કારણ કે ભારતમાં કોરોનાવાયરસની સ્થિતિમાં હવે સુધારો થયો છે.”
સરકારે 23 માર્ચ, 2020 થી એક અઠવાડિયા માટે તમામ આંતરરાષ્ટ્રીય શિડ્યુલ ફ્લાઇટ્સ પર પ્રતિબંધ મૂક્યો હતો. કોરોના મહામારી વચ્ચે આ પ્રતિબંધ લગભગ બે વર્ષ સુધી લંબાયો.
જો કે, એર બબલ હેઠળ, જુલાઈ 2020 થી ભારત અને લગભગ 35 અન્ય દેશો વચ્ચે વિશેષ આંતરરાષ્ટ્રીય ફ્લાઇટ્સ કાર્યરત છે.
આ પગલાથી આંતરરાષ્ટ્રીય પ્રવાસનને વેગ મળશે અને હવાઈ ભાડાં ઘટાડવામાં મદદ મળશે, જે ક્રૂડ ઓઈલના ભાવમાં વધારાને કારણે વધી રહ્યા છે.