અંબાલા: શેરડીની ચુકવણીમાં વિલંબને લઈને ગુસ્સે ભરાયેલા ખેડૂતોએ અંબાલામાં નારાયણગઢ શુગર મિલ સામે શર્ટલેસ એટલે કે શર્ટ કાઢીને વિરોધ પ્રદર્શન કર્યું હતું. ખેડૂતોએ જણાવ્યું હતું કે શેરડીની પિલાણ સીઝન આ મહિનાની શરૂઆતમાં સમાપ્ત થઈ ગઈ છે, પરંતુ રૂ. 80 કરોડથી વધુની ચુકવણી બાકી છે. નિયમો અનુસાર, ખરીદીના 14 દિવસની અંદર ચુકવણી ક્લિયર કરવી આવશ્યક છે. ખેડૂતો અનાજ બજારમાં એકઠા થયા હતા અને તેમની માંગના સમર્થનમાં રેલી કાઢી હતી. ખેડૂતોએ જણાવ્યું હતું કે, આ વર્ષે તેઓને ઘઉં, સરસવ અને બટાકાના પાકને નુકસાન થયું છે અને હવે શેરડીની ચૂકવણી અટકી ગઈ છે. અમે લગભગ એક મહિનાથી ધરણા કરી રહ્યા છીએ, પરંતુ કોઈ ફાયદો થયો નથી.
ધ ટ્રિબ્યુનમાં પ્રકાશિત સમાચાર અનુસાર, આંદોલન માટે રચાયેલી 21 સભ્યોની સમિતિના અધ્યક્ષ સિંગરા સિંહે કહ્યું, દર વર્ષે શેરડીના ખેડૂતોને તેમની ચુકવણી માટે વિરોધ કરવાની ફરજ પાડવામાં આવે છે. શેરડીનું પિલાણ 7 એપ્રિલના રોજ સમાપ્ત થયું હતું અને 80 કરોડથી વધુની ચૂકવણી હજુ બાકી છે. ખેડૂતોને તેમના ખર્ચને પહોંચી વળવા માટે પણ પૈસાની જરૂર છે. અમને માત્ર ખાતરી આપવામાં આવી રહી છે. અમે પેમેન્ટ માટે 2 મેના રોજ અંબાલા ડિવિઝનલ કમિશનરને મળવાનું નક્કી કર્યું છે.
મીડિયા રિપોર્ટ્સ અનુસાર, નારાયણગઢ શુગર મિલના ચીફ એક્ઝિક્યુટિવ ઓફિસર નીરજે કહ્યું, ખેડૂતો સંપૂર્ણ ચુકવણીની માંગ કરી રહ્યા છે, પરંતુ મિલ રકમ ચૂકવવાની સ્થિતિમાં નથી. મિલે આ વર્ષે રૂ. 84 કરોડ અને છેલ્લી સિઝન માટે રૂ. 66 કરોડ ચૂકવીને આશરે રૂ. 165 કરોડની શેરડી ખરીદી છે. મિલ આગામી દિવસોમાં રૂ.20 કરોડ ચૂકવશે.
