નવી દિલ્હી: ત્રણ દેશના વિદેશ પ્રવાસેથી પરત ફરીને તુરંત જ વડાપ્રધાન નરેન્દ્ર મોદીએ ગુરુવારે હીટ વેવ મેનેજમેન્ટ અને ચોમાસા માટે તૈયારીઓ સંબંધિત પરિસ્થિતિની સમીક્ષા કરી હતી. આ મીટિંગ દરમિયાન IMD અને NDMAએ સમગ્ર દેશમાં માર્ચ-મે 2022માં ઊંચા તાપમાનની ટકાવારી વિશે માહિતી આપી હતી.
આ બેઠક દરમિયાન રાજ્યો અને કેન્દ્રશાસિત પ્રદેશોને રાજ્ય, જિલ્લા અને શહેર સ્તરે પ્રમાણભૂત પ્રતિસાદ તરીકે હીટ એક્શન પ્લાન તૈયાર કરવાની સલાહ આપવામાં આવી છે. દક્ષિણ પશ્ચિમના ચોમાસાની તૈયારીઓના સંદર્ભમાં, તમામ રાજ્યોને ‘પૂર તૈયારી યોજના’ તૈયાર કરવા અને યોગ્ય તૈયારીના પગલાં લેવાની સલાહ આપવામાં આવી છે. NDRFને પૂર પ્રભાવિત રાજ્યોમાં તેની તૈનાતી યોજના વિકસાવવાની સલાહ આપવામાં આવી છે.
એવું પણ કહેવામાં આવ્યું હતું કે સમુદાયોને સંવેદનશીલ બનાવવા માટે સોશિયલ મીડિયાનો સક્રિય ઉપયોગ વ્યાપકપણે અપનાવવો જોઈએ.
આ મીટિંગ દરમિયાન વડા પ્રધાન મોદીએ કહ્યું હતું કે ગરમીના મોજા અથવા આગની ઘટનાને કારણે થતા મૃત્યુને ટાળવા માટે આપણે તમામ પગલાં લેવાની જરૂર છે અને કહ્યું કે આવી કોઈપણ ઘટના પર અમારી પ્રતિક્રિયામાં ઓછામાં ઓછો સમય લાગવો જોઈએ.
તેમણે ભારપૂર્વક જણાવ્યું હતું કે વધતા તાપમાનને ધ્યાનમાં રાખીને નિયમિત હોસ્પિટલ ફાયર સેફ્ટી ઓડિટ કરાવવાની જરૂર છે. પ્રધાનમંત્રીએ દેશના વિવિધ વન ઇકોસિસ્ટમમાં અગ્નિના જોખમો સામે જંગલોની નબળાઈને નોંધપાત્ર રીતે ઘટાડવા, સંભવિત આગની સમયસર શોધ અને આગ સામે લડવા માટે અને ઝડપથી કામ કરવા માટે વન કર્મચારીઓ અને સંસ્થાઓની ક્ષમતાઓને વધારવા માટે આહ્વાન કર્યું હતું.
પ્રધાનમંત્રીએ નિર્દેશ આપ્યો કે આગામી ચોમાસાને ધ્યાનમાં રાખીને પીવાના પાણીની ગુણવત્તા પર દેખરેખ રાખવાની વ્યવસ્થા સુનિશ્ચિત કરવાની જરૂર છે જેથી પ્રદૂષણ અને પાણીજન્ય રોગોના ફેલાવાને ટાળી શકાય.
ગરમીના મોજા અને આગામી ચોમાસાના પગલે કોઈપણ સંજોગો માટે તમામ પ્રણાલીઓની સજ્જતા સુનિશ્ચિત કરવા કેન્દ્ર અને રાજ્યની એજન્સીઓ વચ્ચે અસરકારક સંકલનની જરૂરિયાત અંગે બેઠકમાં ચર્ચા કરવામાં આવી હતી.
આ બેઠકમાં વડાપ્રધાનના અગ્ર સચિવ, વડા પ્રધાનના સલાહકાર, કેબિનેટ સચિવ, ગૃહ મંત્રાલયના સચિવ, આરોગ્ય, જલ શક્તિ, NDRF ના DG ,NDMAના સભ્ય, નેશનલ ડિઝાસ્ટર મેનેજમેન્ટ ઓથોરિટી (NDMA)ના મહાનિર્દેશક અને ભારતીય હવામાન વિભાગ, ઉપસ્થિત રહ્યા હતા.
