મુંબઈ: બૃહન્મુંબઈ મ્યુનિસિપલ કોર્પોરેશન (BMC) એ સોમવારથી સમગ્ર મુંબઈમાં પાણીમાં 10 ટકાનો ઘટાડો કરવાની જાહેરાત કરી છે. શહેરને પીવાનું પાણી પૂરું પાડતા સાત તળાવોના કેચમેન્ટ વિસ્તારોમાં અપૂરતા વરસાદને કારણે તેમના હાલના પાણીના ભંડાર 10 ટકાથી નીચે આવી ગયા છે. અત્યાર સુધીમાં, મુંબઈમાં 230.4 મીમી વરસાદ નોંધાયો છે, જે જૂનની સરેરાશ 493.1 મીમીના 50 ટકા કરતા ઓછો છે. ભારતીય હવામાન વિભાગ (IMD) દ્વારા આગામી દિવસોમાં ભારે વરસાદની કોઈ આગાહી ન હોવાથી પાણીમાં વધુ ઘટાડો થવાની સંભાવના છે.
BMCએ જણાવ્યું હતું કે, મુંબઈ મેટ્રોપોલિટન એરિયાને પાણી પૂરું પાડતા 7 ડેમ અને તળાવોમાં અપૂરતા વરસાદ અને અપૂરતા પાણીના સ્ટોકને કારણે 10% પાણી કાપ લાગુ કરવામાં આવશે. બીએમસીના એક રીલીઝમાં એમ પણ કહેવામાં આવ્યું છે કે શહેર અને તેના ઉપનગરો સિવાય, પડોશી થાણે અને ભિવંડી મ્યુનિસિપલ કોર્પોરેશન હેઠળના વિસ્તારો અને કેટલાક ગામોમાં પણ જ્યાં સુધી તળાવોમાં પાણીનો જથ્થો સુધરે ત્યાં સુધી 10 ટકાનો ઘટાડો જોવા મળશે. ઓગસ્ટ 2020 માં સમાન પગલામાં, BMCએ પાણીમાં 20% ઘટાડો કર્યો હતો, જ્યારે જૂન અને જુલાઈ મહિનામાં ભારે વરસાદની પ્રવૃત્તિ જોવા મળી ન હતી. IMDના ડેટા અનુસાર, 1 જૂનથી 27 જૂનના સમયગાળા દરમિયાન, મુંબઈની સાંતાક્રુઝ વેધશાળામાં 230.4 મિમી વરસાદ નોંધાયો હતો. ગયા વર્ષે જૂનમાં આશરે 1,000 મીમી વરસાદ નોંધાયો હતો. IMD એ તેની પાંચ દિવસની આગાહીમાં શહેરમાં ભારે વરસાદની કોઈ ગતિવિધિનો સંકેત આપ્યો નથી. જો કે, 29-30 જૂન માટે યલો એલર્ટ જારી કરવામાં આવ્યું છે, જે અલગ-અલગ સ્થળોએ ભારે વરસાદ અને આજે (મંગળવારે) મધ્યમ વરસાદની ‘ખૂબ સંભાવના’ દર્શાવે છે.