મહારાષ્ટ્રના ઘણા વિસ્તારોમાં સતત ભારે વરસાદને કારણે જનજીવન અસ્તવ્યસ્ત થઈ ગયું છે રાજ્યના ગઢચિરોલીથી નાસિક સુધીના ઘણા જિલ્લાઓ વરસાદથી ખરાબ રીતે પ્રભાવિત છે. ઠેર ઠેર પાણી ભરાયા હોવાના અહેવાલો છે. ભારે વરસાદને કારણે નદી-નાળાઓના જોરદાર પ્રવાહમાં અનેક લોકો હેરાન પરેશાન થઇ ગયા હતા. દરમિયાન, સોમવારે મોડી રાત્રે પુણેમાં બે માળની ઇમારતની દિવાલ ધરાશાયી થઈ હતી. અકસ્માતમાં બે લોકો ઘાયલ થયા હતા અને બે લોકોને બચાવી લેવાયા હતા. અહીં આગામી દિવસોમાં પણ વરસાદથી રાહત નહીં મળે. રાજ્યમાં નાસિક, પુણે સહિત 4 જિલ્લામાં ભારે વરસાદને લઈને રેડ એલર્ટ જાહેર કરવામાં આવ્યું છે.
પુણે ફાયર બ્રિગેડના જણાવ્યા અનુસાર, મોડી રાત્રે પુણે શહેરના નાનાપેઠ વિસ્તારમાં બે માળની ઇમારતની દિવાલ ધરાશાયી થતાં બે લોકો ઘાયલ થયા હતા અને બે લોકોને બચાવી લેવાયા હતા. અહીં, રાજ્યના ગઢચિરોલી જિલ્લામાં ભારે વરસાદ બાદ ત્રણ લોકો લાપતા છે. નાસિક જિલ્લામાં ભારે વરસાદ ચાલુ રહ્યો, જેના કારણે અનેક નદીઓના જળ સ્તર વધી ગયા અને ગોદાવરી નદીની નજીક સ્થિત અનેક મંદિરો ડૂબી ગયા. IMD એ 24 કલાકમાં 20 સેમીથી વધુ ભારે વરસાદની આગાહી સાથે 14 જુલાઈ સુધી નાસિક જિલ્લા માટે રેડ એલર્ટ જાહેર કર્યું છે. પુણે જિલ્લામાં પણ છેલ્લા કેટલાક દિવસોથી ભારે વરસાદ પડી રહ્યો છે. એક અધિકારીના જણાવ્યા અનુસાર, નાસિક જિલ્લાના સુરગાનામાં સૌથી વધુ 238.8 મીમી, પેઠમાં 187.6 મીમી અને ત્ર્યંબકેશ્વરમાં 168 મીમી વરસાદ નોંધાયો છે.
ત્ર્યંબકેશ્વર અને ઇગતપુરી જેવા ઘાટ વિસ્તારોમાં પરંપરાગત રીતે વધુ વરસાદ પડ્યો છે, પરંતુ આ વખતે સુરગાણા અને પેઠમાં પણ નોંધપાત્ર વરસાદ થયો છે, એમ અધિકારીએ જણાવ્યું હતું. તેમણે કહ્યું કે સોમવારે બપોરે 3 વાગ્યે ગંગાપુર ડેમમાંથી 10,035 ક્યુસેક, દારણામાંથી 15,088 ક્યુસેક, કડવામાંથી 6,712 અને નાંદુર-મધ્યમેશ્વરમાંથી 49,480 ક્યુસેક પાણી છોડવામાં આવ્યું હતું. શહેરને પાણી સપ્લાય કરતા ગંગાપુર ડેમમાંથી પાણી છોડવાથી ગોદાવરી નદીમાં પાણીનું સ્તર ઊંચું આવ્યું અને રામકુંડ વિસ્તારમાં દશક્રિયા વિધિ સહિત અનેક નાના મંદિરો ડૂબી ગયા, અધિકારીએ જણાવ્યું હતું. એક અધિકારીએ જણાવ્યું કે, “નાસિકના લોકોને નદીની મધ્યમાં સ્થિત દાતોન્ડે મારુતિ (બે મુખવાળા હનુમાન)ની પ્રતિમાની આસપાસના પાણીના સ્તરને જોઈને પૂરની તીવ્રતાનો ખ્યાલ આવે છે.” હાલમાં પાણીનું સ્તર પ્રતિમાની કમરથી થોડું નીચે છે.
જિલ્લા વહીવટીતંત્રના ડેટા અનુસાર, તમામ ડેમોમાં 29,9730 લાખ ઘનફૂટ પાણી છે, જે તેમની કુલ સંગ્રહ ક્ષમતાના 46 ટકા છે. ગોદાવરી અને અન્ય નદીઓના કિનારાની આસપાસ આવેલા ગામોના લોકોને પરિસ્થિતિ વિશે ચેતવણી આપવામાં આવી છે, અધિકારીએ જણાવ્યું હતું. જો કે હાલમાં પાણીનું સ્તર ખતરાના નિશાનથી નીચે છે. “ભારે વરસાદ પછી ડિંડોરી, ત્ર્યંબકેશ્વર, ડેલવેર, નિપાડ અને ઘોટી જેવા વિસ્તારોમાં ઘણી નાની નદીઓ અને નહેરો તબાહીમાં છે,” તેમણે કહ્યું. આ જળાશયોની આસપાસના ઘણા રસ્તાઓ સાવચેતીના ભાગરૂપે બંધ કરી દેવામાં આવ્યા છે.
