પ્રધાનમંત્રી નરેન્દ્ર મોદીના નેતૃત્વ હેઠળની સરકારે હંમેશા ખેડૂતોની આવક વધારવા અને તેમના સામાજિક-આર્થિક સશક્તિકરણ માટે કામ કરવા પર ભાર મૂક્યો છે. કેન્દ્ર સરકારે કૃષિ ક્ષેત્રના કલ્યાણ માટે અનેક પહેલ કરી છે. આ પૈકી, પ્રધાનમંત્રી કિસાન સન્માન નિધિ (PM-કિસાન) યોજના એક મહત્વપૂર્ણ પહેલ છે. કેન્દ્રીય કૃષિ અને ખેડૂત કલ્યાણ મંત્રી નરેન્દ્ર સિંહ તોમરે આજે રાજ્યોના કૃષિ મંત્રીઓ સાથે વર્ચ્યુઅલ બેઠકમાં આ યોજનાની પ્રગતિની સમીક્ષા કરી હતી. બેઠક દરમિયાન શ્રી તોમરે જણાવ્યું હતું કે, કોઈપણ પાત્ર ખેડૂત આ યોજનાના લાભોથી વંચિત ન રહેવો જોઈએ. તેમણે રાજ્યોને વહેલામાં વહેલી તકે ડેટાની ચકાસણી અને અપડેટ પૂર્ણ કરવા જણાવ્યું હતું.
PM-KISAN હેઠળ, પાત્ર ખેડૂતોને તેમની ઘરની જરૂરિયાત તેમજ કૃષિ અને સંલગ્ન ખર્ચાઓને પહોંચી વળવા માટે 2,000 રૂપિયાના ત્રણ સમાન હપ્તામાં દર વર્ષે 6,000 રૂપિયા આપવામાં આવે છે. ફેબ્રુઆરી 2019 માં તેની શરૂઆત થઈ ત્યારથી, PM-KISAN હેઠળ 11 હપ્તાઓનું વિતરણ કરવામાં આવ્યું છે. આ યોજના દ્વારા લગભગ 11.37 કરોડ પાત્ર ખેડૂતોને 2 લાખ કરોડ રૂપિયાથી વધુ મોકલવામાં આવ્યા છે.
પીએમ-કિસાનનો લાભ તે ખેડૂતોને જ મળે છે જેમની પાસે જમીન છે. PM-KISAN, અન્ય યોજનાઓ અને ભવિષ્યમાં શરૂ થનારી ખેડૂતોની કલ્યાણ યોજનાઓ માટે પાત્ર ખેડૂતોની વહેલી ઓળખ માટે ડેટાબેઝ તૈયાર કરવામાં આવી રહ્યો છે. જેમાં આધાર, ખેડૂતોના બેંક ખાતા અને ખેડૂતોના જમીનના રેકોર્ડ સહિતની તમામ માહિતી તેમના રેકોર્ડ સાથે લિંક કરવામાં આવશે. ડેટાબેઝ બનાવવા માટે રાજ્યોના જમીનના રેકોર્ડને ડિજિટલ સ્વરૂપમાં રૂપાંતરિત કરવાના રહેશે. આજની બેઠકમાં આ અંગે પણ ચર્ચા કરવામાં આવી હતી.
બેઠકમાં ઉત્તર પ્રદેશ, મહારાષ્ટ્ર, ઉત્તરાખંડ, હરિયાણા, આંધ્રપ્રદેશ, ગુજરાત, છત્તીસગઢ, પંજાબ, રાજસ્થાન, આસામ, અરુણાચલ પ્રદેશ, કર્ણાટક, કેરળ અને બિહારના કૃષિ મંત્રીઓએ પોતાના વિચારો રજૂ કર્યા હતા. કેન્દ્રીય કૃષિ સચિવ મનોજ આહુજા અને અધિક સચિવ શ્રી અભિલાક્ષ લખી અને રાજ્યના મંત્રીઓ અને વરિષ્ઠ અધિકારીઓએ બેઠકમાં હાજરી આપી હતી. ડૉ. પ્રમોદ કુમાર મહેરદા, જોઈન્ટ સેક્રેટરી અને સીઈઓ, PM-KISAN એ સ્કીમ પર પ્રેઝન્ટેશન આપ્યું હતું.
