ભુવનેશ્વર: ઓડિશા સરકારે 41 લાખ નાના અને સીમાંત ખેડૂતો અને 85,000 જમીનવિહોણા ખેડૂતોને આજીવિકા અને આવક વૃદ્ધિ માટે કૃષક સહાય (કાલિયા) યોજના હેઠળ રૂ. 869 કરોડની નાણાકીય સહાયનું વિતરણ કર્યું છે. સીએમઓના અખબારી નિવેદન મુજબ, દરેક નોંધાયેલા ખેડૂતને સહાય હેઠળ તેમના બેંક ખાતામાં સીધા રૂ. 2000 મળ્યા છે. વીડિયો કોન્ફરન્સિંગ દ્વારા ખેડૂતોને સંબોધતા મુખ્યમંત્રી નવીન પટનાયકે કહ્યું કે, કાલિયા યોજના દેશની શ્રેષ્ઠ યોજના છે. તેણે નાના અને સીમાંત ખેડૂતોમાં આશા અને વિશ્વાસ પેદા કર્યો છે, તે જમીન વિહોણા ખેડૂતોની આજીવિકાને સુરક્ષિત કરવામાં પણ મદદ કરી રહ્યું છે.
મુખ્યમંત્રી પટનાયકે કહ્યું કે, મે મહિનામાં અક્ષય તૃતીયા પર પણ અમારા ખેડૂત ભાઈઓને 800 કરોડ રૂપિયાથી વધુની રકમ આપવામાં આવી હતી. હું આશા રાખું છું કે, આ સહાય તેમને તેમની કૃષિ ફરજો પૂરી કરવામાં સક્ષમ બનાવશે. મુખ્ય પ્રધાન પટનાયકે પણ ખેડૂતોને પાકના નુકસાન પર સહાયની ખાતરી આપી હતી.હું તમને કહેવા માંગુ છું કે હું હંમેશા તમારી સાથે છું, એમ તેમણે કહ્યું. મેં નુકસાનનું આકલન કરીને વહેલામાં વહેલી તકે રિપોર્ટ સબમિટ કરવા કહ્યું છે. પાકને થયેલા નુકસાન માટે તમને ટૂંક સમયમાં મદદ મળશે. અમારા ખેડૂતોએ ઓડિશાને ગૌરવ અપાવ્યું છે. તેમણે ખાદ્ય સુરક્ષામાં રાજ્યને ખ્યાતિ અપાવી છે. તેથી રાજ્યના તમામ લોકો ખેડૂતોના દેવાદાર છે.
