નવી દિલ્હી: આંતરરાષ્ટ્રીય બજારમાં કાચા તેલ પર સતત દબાણ છે. આ કારણે ઓઈલ કંપનીઓને પેટ્રોલ અને ડીઝલના ભાવને સમાયોજિત કરવામાં ઘણી મહેનત કરવી પડે છે. ભારત સરકારે સ્થાનિક ક્રૂડ ઓઈલના ઉત્પાદન પરના વિન્ડફોલ ટેક્સને સુધારીને રૂ. 6400 પ્રતિ ટન કર્યો છે. આ પગલું પેટ્રોલિયમ ક્ષેત્રમાં કર માળખાને તર્કસંગત બનાવવા અને ઉદ્યોગમાં રોકાણને વેગ આપવાના સરકારના પ્રયાસનો એક ભાગ છે.
અન્ય એક મહત્વપૂર્ણ પગલામાં સરકારે ડીઝલ પરની નિકાસ ડ્યુટી દૂર કરવાનો નિર્ણય લીધો છે. ક્રૂડ ઓઈલના ઉત્પાદન પર વિન્ડ ફોલ ટેક્સના સુધારાથી સરકારને વધારાની આવક થવાની અપેક્ષા છે. આ પગલાથી ઓઇલ કંપનીઓ પર નકારાત્મક અસર થવાની ધારણા છે કારણ કે હવે તેમને સ્થાનિક બજારમાં ક્રૂડ ઓઇલના વેચાણ પર વધુ ટેક્સ ચૂકવવો પડશે.
20 એપ્રિલ ગુરુવારે પેટ્રોલ અને ડીઝલના ભાવ સ્થિર જોવા મળી રહ્યા છે. જો કે, દેશભરના શહેરોમાં ઇંધણના ભાવમાં અસ્થિરતા જોવા મળી છે. ઔરંગાબાદમાં ડીઝલ અને પેટ્રોલની કિંમત 0.27 રૂપિયા પ્રતિ લીટર વધીને અનુક્રમે 93.82 રૂપિયા અને 107.34 રૂપિયા થઈ ગઈ છે. ગૌહાતીમાં ડીઝલના ભાવમાં રૂ. 1.29નો જંગી ઉછાળો નોંધાતા રૂ. 89.85 પ્રતિ લીટર જ્યારે પેટ્રોલની કિંમત 80 પૈસા વધીને રૂ. 97.82 પ્રતિ લીટર થઇ ગઇ હતી. ત્રિવેન્દ્રમ, થાણે, પટના, નાસિક અને અન્ય શહેરોમાં પણ ઇંધણના ભાવમાં વધારો જોવા મળ્યો હતો, જ્યારે ફરીદાબાદ, ભોપાલ, મેંગલોર અને નાગપુરમાં પેટ્રોલ અને ડીઝલના ભાવમાં ઘટાડો થયો હતો.
વેલ્યુ એડેડ ટેક્સ (VAT), નૂર શુલ્ક, સ્થાનિક કર વગેરે જેવા વિવિધ પરિમાણોને આધારે પેટ્રોલ અને ડીઝલના ભાવ રાજ્ય પ્રમાણે બદલાય છે. ઇંધણના દરોમાં છેલ્લો દેશવ્યાપી ફેરફાર ગયા વર્ષે 21 મેના રોજ થયો હતો, જ્યારે નાણાપ્રધાન નિર્મલા સીતારમણે પેટ્રોલ પર પ્રતિ લિટર રૂ. 8 અને ડીઝલ પર રૂ. 6 પ્રતિ લિટર એક્સાઇઝ ડ્યુટીમાં ઘટાડો કર્યો હતો.
દિલ્હી-NCRમાં પેટ્રોલનો ભાવ રૂ. 96.72, ગુરુગ્રામમાં રૂ. 97.10, નોઇડામાં રૂ. 96.77 નોંધાયો હતો. મુંબઈમાં પેટ્રોલની કિંમત 106.31 રૂપિયા નોંધાઈ હતી. કેન્દ્રશાસિત પ્રદેશ આંદામાન અને નિકોબારમાં સૌથી નીચો ભાવ રૂ. 84.10 હતો. હૈદરાબાદમાં પેટ્રોલની કિંમત 109.66 રૂપિયા છે, જ્યારે ઉત્તર પ્રદેશની રાજધાની લખનૌમાં તે 96.57 રૂપિયા છે.
