नवी दिल्ली : केंद्रीय अर्थमंत्री निर्मला सीतारामन यांच्या अध्यक्षतेखाली ११ जुलै रोजी जीएसटी काऊन्सीलची बैठक होणार आहे. दिल्लीतील विज्ञान भवनात परिषदेची ही ५० वी बैठक होणार आहे. GST परिषदेने ट्विट करून याची माहिती दिली आहे. अपिलीय न्यायाधिकरणाच्या स्थापनेला गती देणे आणि या संदर्भात राज्यांमध्ये करार करणे या बैठकीचा मुख्य अजेंडा असेल अशी माहिती सूत्रांनी दिली. मात्र, दैनंदिन वस्तूंच्या कर दरातील बदलाबाबत अद्याप स्थिती स्पष्ट नाही.
दरम्यान, नवभारत टाइम्समधील वृत्तानुसार, गेल्या काही दिवसांपासून देशभरात जीएसटी कर चुकवेगिरीची प्रकरणेही उघड होत आहेत. दिल्लीहून येणाऱ्या मालाच्या जीएसटीची चोरी होत आहे. ही चोरी लपविण्यासाठी दरमहा अनेक कोटींची अवैध वसुली केली जात आहे. दररोज शेकडो ट्रक कोट्यवधी रुपयांचा कर चुकवत आहेत. करचुकवेगिरीचे काम करणारे सर्व विभाग यात गुंतले आहेत. वाहतूकदारांकडून दर महिन्याला १०० कोटी रुपये सुविधा शुल्क भरले जात आहे. खंडणीच्या संबंधित प्रकरणात एक अधिकारी आधीच तुरुंगात आहे.
दररोज दिल्लीतून औषधे, गुटखा, पान मसाला आणि किराणा मालाची वाहतूक केली जाते. रात्री ट्रक माल घेऊन फरीदाबाद आणि पलवलच्या दिशेने जातात. बिलावरील जीएसटी चोरीला जातो. यात दरमहा १०० कोटींहून अधिक रक्कम सुविधा शुल्क म्हणून दिली जात असल्याचा अंदाज आहे.
