साओ पाउलो : उद्योग समूह UNICA च्या आकडेवारीनुसार, नोव्हेंबर महिन्याच्या पहिल्या पंधरवड्यात ब्राझीलच्या मध्य-दक्षिण भागात साखरेचे उत्पादन 31 टक्क्यांनी वाढून एकूण 2.19 दशलक्ष मेट्रिक टन (MMT) पर्यंत पोहोचले. UNICA च्या अहवालात असेही म्हटले आहे की, या कालावधीत 34.77 MMT ऊसाचे गाळप करण्यात आले आहे, जे मागील वर्षाच्या तुलनेत 32% जास्त आहे. याव्यतिरिक्त एकूण इथेनॉल उत्पादनात 29% वाढ झाली असून उत्पादन 1.64 अब्ज लिटरपर्यंत पोहोचले आहे.
15 नोव्हेंबर रोजी प्रसिद्ध झालेल्या अहवालात, आंतरराष्ट्रीय साखर संघटनेने (ISO) 2023-24 हंगामात जागतिक पुरवठा तूट कमी होण्याचा अंदाज व्यक्त करत लक्षणीय सुधारणा दर्शवली होती. ही तूट आता 0.33 दशलक्ष मेट्रिक टन (एमएमटी) राहण्याचा अंदाज आहे, जो पूर्वीच्या 2.11 एमएमटीच्या अंदाजापेक्षा खूप कमी आहे.
ISO ने या सकारात्मक बदलाचे श्रेय प्रामुख्याने ब्राझीलमधील साखर उत्पादनात झालेल्या भरीव वाढीला दिले आहे. ISO च्या मतानुसार, 2023 मध्ये ब्राझीलच्या साखर हंगामात अनुकूल परिस्थिती अनुभवली गेली. याउलट, इतर प्रदेशांमध्ये विशेषत: आशियामध्ये कमी पावसामुळे साखर उत्पादनात लक्षणीय घट झाली.2023-24 हंगामातील जागतिक साखर उत्पादनाच्या दृष्टीकोनात सुधारणा करताना, ISO ने 174.84 MMT च्या आधीच्या अंदाजात सुधारणा करत उत्पादन 179.88 MMT वर जाण्याचा अंदाज वर्तवला आहे. त्याचवेळी, जागतिक साखरेच्या वापराचा अंदाज ऑगस्टमध्ये 176.96 MMT च्या तुलनेत 180.22 MMT करण्यात आला.
