नवी दिल्ली : महाराष्ट्र आणि कर्नाटकात यंदा पावसाने दिलेल्या हुलकावणीचा परिणाम देशातील साखर उत्पादनावर झालेला दिसून येत आहे. चालू हंगामातील ऑक्टोबर ते नोव्हेंबर या दोन महिन्यांच्या कालावधीमध्ये देशात साखर उत्पादनामध्ये १०.६५ टक्क्यांची घट झाली आहे. एकूण साखर उत्पादन ४२.२ लाख टन झाले आहे अशी माहिती नॅशनल फेडरेशन ऑफ को-ऑपरेटिव्ह शुगर फॅक्टरीज लिमिटेडने दिली आहे. गेल्या वर्षी समान कालावधी मध्ये ४८.३ लाख टन साखरेचे उत्पादन झाले होते. महाराष्ट्र आणि कर्नाटक या दोन राज्यांमध्ये कमी उत्पादन झाल्याचा परिणाम एकूण साखर उत्पादनावर झाला आहे. यंदाच्या हंगामात, २०२३-२४ मध्ये एकूण साखर उत्पादन ९१.५ लाख टन होण्याचा अंदाज आहे. मागील हंगामातील ३.३ लक्ष टन उत्पादन झाले होते.
महाराष्ट्रातील ऑक्टोबर-नोव्हेंबर या दोन महिन्यांत १३.५ लाख टन साखर उत्पादित झाली आहे. गेल्या वर्षी २०.२ लाख टन उत्पादन झाले होते. तर देशात साखर उत्पादनात तिसऱ्या क्रमांकावर असलेल्या कर्नाटकमध्ये साखर उत्पादन ११ लाख टनांवर आले आहे. आधीच्या वर्षी समान कालावधीत हे उत्पादन १२.१ लाख टन होते. चालू हंगामात पहिल्या दोन महिन्यांत साखर खरेदीची पातळी ४.४५ टक्के आहे. एकूण ऊस गाळपाचे प्रमाण कमी झाल्याने उत्पादन खालावले आहे. यंदाच्या साखर हंगामात, २०२३-२४ मध्ये ऑक्टोबर-नोव्हेंबर या काळात १०.१ लाख टन उसाचे गाळप झाले. गेल्या वर्षी समान कालावधीत हे गाळप ७०.६ लाख टन झाले होते. यंदा ४३३ कारखाने सुरू असून गेल्यावर्षी या काळात ४५१ कारखान्यांनी गाळप सुरू केले होते.
