પટના: બુધવારથી પટનાના જ્ઞાન ભવનમાં બે દિવસીય ‘બિહાર બિઝનેસ કનેક્ટ 2023’ સમિટમાં વિશ્વભરમાંથી 600 થી વધુ રોકાણકારો હાજરી આપે તેવી શક્યતા છે. બિહાર સરકાર સબસિડી, કરમુક્તિ અને ઝંઝટ-મુક્ત જમીન લીઝ તેમજ રોકાણ માટે રેડી-ટુ-મૂવ ઈન્ફ્રાસ્ટ્રક્ચર સેટઅપ ઓફર કરી રહી છે. સરકાર ઇન્ફોર્મેશન ટેક્નોલોજી, ફૂડ પ્રોસેસિંગ, કૃષિ, ટેલિકોમ, ટેક્સટાઇલ, ઇથેનોલ અને હોસ્પિટાલિટી સેક્ટરમાં મોટા રોકાણની અપેક્ષા રાખે છે. ‘બિહાર બિઝનેસ કનેક્ટ 2023’ને બિહારના મુખ્ય પ્રધાન નીતિશ કુમાર, નાયબ મુખ્ય પ્રધાન તેજસ્વી પ્રસાદ યાદવ અને રાજ્યના ઉદ્યોગ પ્રધાન સમીર કુમાર મહાસેઠ અને અન્ય રાજકીય નેતાઓ સંબોધિત કરશે.
‘બિહાર બિઝનેસ કનેક્ટ 2023’ ખાતે અદાણી ગ્રુપમાંથી પ્રણવ અદાણી, કમલ જયસ્વાલ (નાહર ઉદ્યોગ ગ્રુપ), રાજેશ અગ્રવાલ (માઈક્રોમેક્સ વેન્ચર્સ), તુષાર જૈન (હાઈ સ્પિરિટ કોમર્શિયલ વેન્ચર્સ), મહેશ કુમાર (ટાઈગર એનાલિટિક્સ) અને રાકેશ સ્વામી (ગોદરેજ ગ્રુપ) સહિત અન્ય મોટા ઉદ્યોગપતિઓ જોડાઈ રહ્યા છે. બિહારના મુખ્ય સચિવ આમિર સુભાનીએ મીડિયાને સંબોધતા કહ્યું કે, બિહારે ઔદ્યોગિક વિકાસ માટે સારું વાતાવરણ ઊભું કર્યું છે અને અમે સંભવિત રોકાણકારોને જણાવવા માંગીએ છીએ કે બિહારમાં રોકાણ કરવું તેમના માટે કેટલું ફાયદાકારક રહેશે. પ્લગ-એન્ડ-પ્લે પોલિસી, જેમાં અમે જરૂરી ઇન્ફ્રાસ્ટ્રક્ચર સાથે રેડી-ટુ-મૂવ-ઇન સરકારી સેટઅપ પ્રદાન કરીએ છીએ, તે રોકાણકારોમાં પહેલેથી જ એક મુખ્ય આકર્ષણનું પરિબળ છે.
બિહાર ઉદ્યોગ વિભાગના અધિક મુખ્ય સચિવ સંદીપ પાઉન્ડ્રીકે જણાવ્યું હતું કે, બિહાર કઈ તકો આપી શકે છે તે બતાવવા માટે અમે નવી દિલ્હી, મુંબઈ, કોલકાતા, ચેન્નાઈ અને બેંગલુરુમાં રોકાણકારોની બેઠકોનું આયોજન કર્યું છે. અમે યુએસ, યુએઈ, બાંગ્લાદેશ, તાઈવાન અને જાપાનમાં પણ આવી જ બેઠકોનું આયોજન કર્યું છે.
તમને જણાવી દઈએ કે, બિહારમાં ઈથેનોલ સેક્ટર પણ ઝડપથી વધી રહ્યું છે. બિહારમાં ઇથેનોલ યુનિટ સ્થાપવામાં ઘણી કંપનીઓએ રસ દાખવ્યો છે. બિહારના મંત્રીઓ સમયાંતરે કહેતા રહે છે કે રાજ્ય ઇથેનોલ ઉત્પાદનના સંદર્ભમાં દેશમાં હબ બનવા માંગે છે.
