નવી દિલ્હી: ભારતના ચૂંટણી પંચે શનિવારે જાહેરાત કરી કે લોકસભાની ચૂંટણી 7 તબક્કામાં યોજાશે. પેટાચૂંટણી, વિધાનસભા ચૂંટણી અને સામાન્ય ચૂંટણીઓ સહિત તમામ ચૂંટણીની મતગણતરી 4 જૂને થવાની છે. વર્તમાન સરકારનો કાર્યકાળ 16 જૂને પૂરો થઈ રહ્યો છે. છેલ્લી લોકસભા ચૂંટણીનું શેડ્યૂલ 10 માર્ચે ECI દ્વારા જાહેર કરવામાં આવ્યું હતું અને સમગ્ર દેશમાં સાત તબક્કામાં 11 એપ્રિલે મતદાન શરૂ થયું હતું. 23 મેના રોજ મતગણતરી કરવામાં આવી હતી.
CEC રાજીવ કુમારના જણાવ્યા અનુસાર, 12 લાખથી વધુ મતદાન મથકો પર આગામી ચૂંટણીમાં 96.8 કરોડ લોકો મતદાન કરવા પાત્ર છે. મુખ્ય ચૂંટણી કમિશનર રાજીવ કુમારે કહ્યું કે 85 વર્ષથી વધુ ઉંમરના મતદારોને ઘરેથી મતદાન કરવાની મંજૂરી આપવામાં આવશે. તેમણે એમ પણ કહ્યું કે, તમામ મતદાન મથકો પર પીવાના પાણી અને શૌચાલય જેવી લઘુત્તમ મૂળભૂત સુવિધાઓ પૂરી પાડવામાં આવશે.
પ્રથમ તબક્કાનું મતદાન 19 એપ્રિલે થશે. આ સમયગાળા દરમિયાન 21 રાજ્યો અને કેન્દ્રશાસિત પ્રદેશોમાં મતદાન થશે. પ્રથમ તબક્કામાં લોકસભાની કુલ 102 બેઠકો પર મતદાન થશે. બીજા તબક્કાનું મતદાન 26 એપ્રિલે થશે. બીજા તબક્કામાં દેશના 13 રાજ્યો અને કેન્દ્રશાસિત પ્રદેશોમાં મતદાન થશે. આ સમયગાળા દરમિયાન દેશમાં લોકસભાની 89 બેઠકો પર ચૂંટણી યોજાશે. ચૂંટણીના પરિણામો 4 જૂને આવશે. ત્રીજા તબક્કામાં 12 રાજ્યો અને કેન્દ્રશાસિત પ્રદેશોની 94 લોકસભા બેઠકો પર મતદાન થશે ત્રીજા તબક્કા માટે 7 મેના રોજ મતદાન થશે. ચોથા તબક્કા હેઠળ 13 મેના રોજ મતદાન થશે. આ સમયગાળા દરમિયાન દેશના 10 રાજ્યો અને કેન્દ્રશાસિત પ્રદેશોની 96 લોકસભા બેઠકો પર મતદાન થશે. પાંચમા તબક્કાનું મતદાન 20 મેના રોજ થશે. આ સમયગાળા દરમિયાન 8 રાજ્યો અને કેન્દ્રશાસિત પ્રદેશોની 49 લોકસભા બેઠકો પર મતદાન થશે.ચૂંટણીના પરિણામો 4 જૂને આવશે. છઠ્ઠા તબક્કા દરમિયાન 25 મેના રોજ મતદાન થશે.આ દિવસે દેશના સાત રાજ્યો અને કેન્દ્રશાસિત પ્રદેશોની 57 લોકસભા બેઠકો પર મતદાન થશે. સાતમા અને છેલ્લા તબક્કાનું મતદાન 1 જૂને થશે. છેલ્લા તબક્કા દરમિયાન 8 રાજ્યો અને કેન્દ્રશાસિત પ્રદેશોમાં મતદાન થશે. આ દરમિયાન 57 લોકસભા સીટો પર મતદાન થશે.
