बिजनौर : गतवर्षी रेड रॉट रोगामुळे मोठ्या प्रमाणात नुकसान झाल्यानंतर उत्तर प्रदेशातील ऊस उत्पादक या रोगाचा पुन्हा प्रादुर्भाव झाल्याने चिंतेत सापडले आहेत. गेल्या हंगामाची पुनरावृत्ती टाळण्यासाठी उत्तर प्रदेशच्या ऊस विभागाने विविध जिल्ह्यांमध्ये बैठका घेण्यास सुरुवात केली आहे. अधिकाऱ्यांनी सांगितले की, गेल्यावर्षी या रोगाने पिकाचे प्रचंड नुकसान केले होते. लाल सड रोग कोलेटोट्रिचम फॉल काटा या बुरशीमुळे होतो. या बुरशीचा प्रादुर्भाव प्रामुख्याने ऊसाच्या ‘०२३८’ जातीला होतो. त्यामुळे ऊस विभागाने शेतकऱ्यांना या प्रजातीच्या उसाची लागवड करू नये, असा सल्ला दिला आहे.
द टाइम्स ऑफ इंडियामध्ये प्रकाशित वृत्तानुसार, बैठकीला उपस्थित असलेले सोहराचे वरिष्ठ ऊस विकास निरीक्षक वीरेंद्र नाथ सहाय म्हणाले, ऊस आयुक्तांनी सर्व अधिकाऱ्यांना सतर्क केले आहे. या रोगाबाबत शेतकऱ्यांना अधिक जागरूक करण्यासाठी आम्ही बैठका घेत आहोत. चालू हंगामात अनेक शेतकऱ्यांनी ‘०२३८’ जातीऐवजी नवीन जातीची लागवड केली आहे. परंतु, काही शेतकरी अजूनही ‘०२३८’ जातीची लागवड करत आहेत. त्यांनी पुढील वर्षी त्यात बदल करावा अशी आमची इच्छा आहे. आम्ही यावर्षी नवीन वाण उपलब्ध करून दिले आहेत. सहाय म्हणाले की, आम्ही ऊस उत्पादकांना प्रादुर्भावग्रस्त ऊस रोपे उपटून जाळून, त्यावर ब्लिचिंग पावडर शिंपडण्याचे आवाहन करत आहोत. त्यामुळे रोगाचा प्रादुर्भाव रोखण्यास मदत होईल.
ऊस पिकाचा “कॅन्सर” म्हणून ओळखला जाणारा लाल सड रोग, जो सहसा पावसाळ्यात पसरतो, तो उत्तर प्रदेशच्या प्रमुख ऊस उत्पादक भागात दिसू लागला आहे. त्यामुळे शेतकऱ्यांमध्ये घबराट पसरली आहे. अधिकाऱ्यांच्या म्हणण्यानुसार, विशिष्ट जातीच्या वाणाची लागवड दीर्घकाळापर्यंत केली जाते आणि ती बदलली जात नाही, तेव्हा हा रोग होतो.
