नवी दिल्ली: भारतीय हवामानशास्त्र विभाग (एलपीए) IMD) ने म्हटले आहे कि, जूनमधील असमान कामगिरीनंतर, नैऋत्य मान्सून जुलैमध्ये जोमदार बरसण्याची अपेक्षा आहे आणि संपूर्ण देशात सरासरी पाऊस दीर्घ कालावधीच्या सरासरीच्या (एलपीए) 106 टक्के अपेक्षित आहे, जो “सामान्यतेपेक्षा जास्त आहे. जुलैमध्ये देशासाठी LPA 28.04 सेमी आहे आणि पाऊस यापेक्षा जास्त होण्याची अपेक्षा आहे. या स्थितीमुळे खरीप पेरणीला चालना मिळेल.
IMD महासंचालक मृत्युंजय महापात्रा यांनी सोमवारी एका आभासी पत्रकार परिषदेत सांगितले कि, जुलै आणि ऑगस्ट हे चार महिन्यांच्या नैऋत्य मान्सूनचे दोन महत्त्वाचे महिने आहेत आणि एकूण 60 टक्क्यांहून अधिक योगदान देतात. हिमाचल प्रदेश, उत्तराखंड आणि जम्मू आणि काश्मीर तसेच गोदावरी नदी क्षेत्रात पुराचा धोका वाढण्याची शक्यता त्यांनी व्यक्त केली. ते म्हणाले की, जुलैमध्ये ईशान्य भारतातील काही भागात सामान्यपेक्षा जास्त पाऊस होण्याची शक्यता आहे .
महापात्रा म्हणाले की ,अल निनो संपला आहे आणि पॅसिफिक महासागरावर “तटस्थ” परिस्थिती कायम आहे, जी हळूहळू ला निनाकडे जाईल. हवामान खात्याने सांगितले की, जुलैमध्ये पश्चिम किनारपट्टी वगळता वायव्य भारत आणि दक्षिण द्वीपकल्पीय भारताच्या अनेक भागांमध्ये कमाल तापमान सामान्यपेक्षा कमी राहण्याची शक्यता आहे. वायव्य आणि मध्य भारताच्या लगतचा काही भाग आणि दक्षिण-पूर्व द्वीपकल्पीय भारतातील काही भाग वगळता देशातील अनेक भागांमध्ये किमान तापमान सामान्यपेक्षा जास्त राहण्याची शक्यता आहे. दक्षिण-पश्चिम मान्सूनने जूनमध्ये एक दीर्घ ब्रेक घेतला, ज्यामुळे संचयी तूट निर्माण झाली. यंदाच्या जूनमध्ये पावसाची तुट गेल्या पाच वर्षांतील सर्वात जास्त म्हणजेच 11 टक्के आहे, असे हवामान खात्याने म्हटले आहे. ‘आयएमडी’च्या आकडेवारीनुसार, जून महिन्यात देशात सरासरी 147.2 मिमी पाऊस झाला आहे.
