સપ્તાહના પ્રથમ દિવસે ભારતીય શેરબજારમાં ઘટાડા સાથે વેપાર શરૂ થયો છે. બેંકિંગ શેરોમાં વેચવાલીથી બજારમાં આ ઘટાડો થયો છે. સેન્સેક્સ 82000ની નીચે સરકી ગયો છે અને 152 પોઈન્ટના ઘટાડા સાથે 81,953 પોઈન્ટ પર ટ્રેડ કરી રહ્યો છે અને નેશનલ સ્ટોક એક્સચેન્જનો નિફ્ટી 34 પોઈન્ટના ઘટાડા સાથે 24,734 પોઈન્ટ પર ટ્રેડ કરી રહ્યો છે. જો કે, મિડકેપ અને સ્મોલકેપ શેરોમાં ખરીદીની મજબૂત ગતિ જોવા મળી રહી છે અને બંને સેક્ટરના સૂચકાંકો ઝડપથી કારોબાર કરી રહ્યા છે. સવારે 10:30 વાગ્યે સેન્સેક્સ 325 પોઇન્ટ નીચે જોવા મળ્યો હતો જ્યારે નિફ્ટી 92 પોઇન્ટ અને બેન્ક નિફ્ટી 50 પોઇન્ટ નીચે જોવા મળ્યો હતો.
આજના ટ્રેડિંગમાં સેન્સેક્સના 30 શેરોમાંથી 10 શેરો ઉછાળા સાથે ટ્રેડ થઈ રહ્યા છે જ્યારે 20 શેરો ઘટાડા સાથે છે. વધતા શેરોમાં ITC 0.50 ટકા, લાર્સન 0.42 ટકા, રિલાયન્સ 0.41 ટકા, અલ્ટ્રાટેક સિમેન્ટ 0.28 ટકા, ટાટા સ્ટીલ 0.20 ટકા, HCL ટેક 0.13 ટકા, અદાણી પોર્ટ્સ 0.05 ટકાના વધારા સાથે ટ્રેડ કરી રહ્યાં છે. જ્યારે JSW સિમેન્ટ 0.76 ટકા, ટેક મહિન્દ્રા 0.70 ટકા, ટાઇટન 0.76 ટકા, કોટક મહિન્દ્રા બેન્ક 0.57 ટકા, એક્સિસ બેન્ક 0.47 ટકા, TCS 0.45 ટકાના ઘટાડા સાથે ટ્રેડ કરી રહ્યાં છે.
આજના બિઝનેસમાં તેજીવાળા ક્ષેત્રો પર નજર કરીએ તો, રિયલ એસ્ટેટ, મીડિયા અને કન્ઝ્યુમર ડ્યુરેબલ્સ એ ત્રણ જ સેક્ટર છે જેમના શેરમાં તેજી છે. જ્યારે બેન્કિંગ, આઈટી, ઓટો, ફાર્મા, એફએમસીજી, મેટલ્સ, એનર્જી હેલ્થકેર અને ઓઈલ એન્ડ ગેસ સેક્ટરના શેરમાં ઘટાડો જોવા મળી રહ્યો છે. ઈન્ડેક્સમાં ઘટાડા છતાં મિડકેપ અને સ્મોલકેપ શેરોમાં ઝડપથી કારોબાર થઈ રહ્યો છે. નિફ્ટી મિડકેપ ઈન્ડેક્સ 243 પોઈન્ટના વધારા સાથે કારોબાર કરી રહ્યો છે અને નિફ્ટી સ્મોલકેપ ઈન્ડેક્સ 118 પોઈન્ટના વધારા સાથે કારોબાર કરી રહ્યો છે.
વર્તમાન સપ્તાહ ભારતીય શેરબજાર માટે ખૂબ જ મહત્વપૂર્ણ છે. યુએસ સેન્ટ્રલ બેંક ફેડરલ રિઝર્વ સહિત વિશ્વભરની 18 કેન્દ્રીય બેંકો વ્યાજ દરો અંગે જાહેરાત કરવા જઈ રહી છે જે 18 ડિસેમ્બરે વ્યાજ દરો અંગે નિર્ણય લેશે. એવી અપેક્ષા છે કે ફેડરલ રિઝર્વ વ્યાજ દરોમાં ઘટાડો કરી શકે છે. જથ્થાબંધ કિંમતો પર આધારિત ફુગાવાના આંકડા આજે ભારતમાં જાહેર કરવામાં આવશે.
