सांगली : को- जनरेशन असोसिएशन ऑफ इंडियातर्फे हंगाम २०२३-२४ साठी क्रांतिअग्रणी डॉ. जी. डी. बापू लाड सहकारी साखर कारखान्याच्या सहवीजनिर्मिती प्रकल्पास राष्ट्रीय पातळीवरील ‘उत्कृष्ट सहवीज निर्मिती प्रकल्प’ पुरस्कार मिळाला. पुणे येथे ज्येष्ठ नेते शरद पवार यांच्या प्रमुख उपस्थितीत या पुरस्कारांचे वितरण करण्यात आले. सहकारमंत्री बाबासाहेब पाटील, राष्ट्रीय साखर संघाचे अध्यक्ष हर्षवर्धन पाटील, माजी अर्थमंत्री जयंत पाटील, माजी मंत्री जयप्रकाश दांडेगावकर आदींसह मान्यवर उपस्थित होते. क्रांती कारखान्याने मिळवलेल्या या यशामध्ये कारखान्याचे मार्गदर्शक आमदार अरुण लाड, सर्व संचालक, सभासद, अधिकारी, कर्मचारी आणि शेतकरी बंधू-भगिनींचे योगदान आहे असे कारखान्याचे अध्यक्ष शरद लाड यांनी सांगितले.
अध्यक्ष लाड म्हणाले की, कारखान्याचा १९.७० मेगावॅट क्षमतेचा सहवीज निर्मिती प्रकल्प सन २००९ – २०१० मध्ये कार्यान्वित झाला आहे. या प्रकल्पामधून १० मे. वॅट वीज महावितरण कंपनीस विक्री केली जाते. सदर प्रकल्पाच्या उभारणीसाठी इतर सर्व कारखान्यांच्या तुलनेत फारच कमी आला आहे. दरवर्षी क्रांती कारखान्याला विविध पुरस्कारांनी करण्यात सन्मानित येते. यंदा को-जन विभागातील तीन अधिकाऱ्यांना सहवीज निर्मिती प्रकल्पासाठी केलेल्या उत्कृष्ट कामगिरी व योगदानाबद्दल पुरस्कार देऊन सन्मानित करण्यात आले आहे. उत्कृष्ट को जन मॅनेजर संदीप राजगोंडा भोजे, उत्कृष्ट इन्स्ट्रुमेंट मॅनेजर शिवाजी जनार्दन साळुंखे उत्कृष्ट इलेक्ट्रिकल मॅनेजर किरण रावसाहेब साजणे यांचा यात समावेश आहे. त्यांनी केलेल्या कामाची ही पोहोचपावती आहे.
