अहिल्यानगर : प्रवरानगर येथील पद्मश्री डॉ. विठ्ठलराव विखे पाटील सहकारी साखर कारखाना संचालक मंडळाची पंचवार्षिक निवडणूक येत्या ९ मे रोजी होणार आहे. या निवडणुकीचा कार्यक्रम पुणे येथील राज्य सहकारी निवडणूक प्राधिकरणाने जाहीर केला. या निवडणूक कार्यक्रमानुसार ९ मे २०२५ रोजी मतदान होईल, तर १० मे रोजी मतमोजणी होईल. नामनिर्देशन पत्र निवडणूक निर्णय अधिकारी यांच्या राहाता येथील कार्यालयात ३ ते ९ एप्रिल या कालावधीत सुटीचे दिवस वगळून सकाळी ११ ते दुपारी ३ वाजेपर्यंत मिळतील, तसेच स्वीकारण्यात येतील.
प्राप्त नामनिर्देशन पत्रांची छाननी ११ एप्रिल रोजी सकाळी ११ वाजता करण्यात येईल. छाननीनंतर वैध नामनिर्देशन पत्रांची यादी १५ एप्रिल रोजी प्रसिद्ध करण्यात येईल. उमेदवार १५ एप्रिल ते २९ एप्रिल या कालावधीत अर्ज मागे घेऊ शकतात. माघारीनंतर प्रत्यक्ष निवडणूक लढविणाऱ्या उमेदवारांची यादी व निवडणूक चिन्ह वाटप २ मे रोजी करण्यात येईल. या निवडणुकीसाठी शिर्डी उपविभागीय अधिकारी माणिक आहेर यांची निवडणूक निर्णय अधिकारी म्हणून, तर तहसीलदार अमोल मोरे यांची सहायक निवडणूक निर्णय अधिकारी म्हणून नियुक्ती करण्यात आली आहे. पद्मश्री डॉ. विठ्ठलराव विखे पाटील सहकारी साखर कारखान्याची प्रारूप मतदार यादी २५ फेब्रुवारी व अंतिम मतदार यादी १९ मार्च २०२५ रोजी प्रसिद्ध करण्यात आलेली आहे, असे निवडणूक अधिसूचनेद्वारे कळविण्यात आले आहे.
