लखनौ : मुख्यमंत्री योगी आदित्यनाथ यांनी उत्तर प्रदेशच्या विकासासाठी चांगली दृष्टी दिली आहे याचा मला आनंद आहे असे प्रतिपादन केंद्रीय रस्ते वाहतूक आणि महामार्ग मंत्री नितीन गडकरी यांनी केले. ते म्हणाले की, मी २०२४ पासून इथेनॉलबद्दल बोलत होतो. मला आनंद आहे की आगामी काळात उत्तर प्रदेशमध्ये इथेनॉलपासून फक्त वाहनेच चालणार नाहीत तर विमान इंधनाच्या रुपात उत्तर प्रदेशातून इथेनॉल घेऊन जगातील विमानेही उड्डाण करतील, असा विश्वास गडकरी यांनी व्यक्त केला.
मंत्री गडकरी म्हणाले, केवळ इथेनॉलच नव्हे तर मिथेनॉल, बायोसीएनजी, इलेक्ट्रिक आणि हायड्रोजन असे इंधनातील वैविध्य हे आपले भविष्य आहे. आगामी काळात जर उत्तर प्रदेशने हायड्रोजन उत्पादनात प्रगती केली तर ऊर्जा आयात करणारा आपला देश ऊर्जा निर्यातदार बनेल. आयातीबाबत आम्ही इंडियन ऑइलला विनंती केली आहे आणि ते नियोजन करत आहेत, असे गडकरी म्हणाले. इथेनॉल उत्पादनामुळे शेतकरी केवळ अन्नदाताच नव्हे तर ऊर्जा पुरवठादारही बनतील. आम्ही शेतकर्‍यांचा बिटुमेन-डेटा (रस्ते निर्मितीसाठी आवश्यक बिटुमेन पुरवठादार) बनविण्याची योजनादेखील तयार करत आहोत.
गडकरी यांनी स्थानिक खासदार तथा केंद्रीय संरक्षण मंत्री राजनाथ सिंह, मुख्यमंत्री योगी आदित्यनाथ यांच्या उपस्थितीत लखनौमध्ये ३,३०० कोटी रुपयांपेक्षा जास्त खर्चाच्या दोन राष्ट्रीय महामार्ग प्रकल्पांचे संयुक्तपणे उद्घाटन केले.
त्यानंतर मंत्री गडकरी यांनी उत्तर प्रदेशला हायड्रोजन उत्पादनात पुढे जाण्याचे आवाहन केले. ते म्हणाले, भारत ऊर्जा निर्यात करणारा देश बनू शकेल. उत्तर प्रदेशात मोठ्या प्रमाणात ऊस उत्पादक शेतकरी आहेत. मोदी सरकारने शेतकऱ्यांचे भविष्य बदलण्यासाठी अनेक नवीन धोरणे आखली आहेत. ती आता प्रभावी ठरत आहेत.
