सुरत : गुजरात को-ऑपरेटिव्ह मिल्क मार्केटिंग फेडरेशन (GCCMF) पुढील एका महिन्यात अमूल साखर, गूळ आणि चहा लाँच करत आपला “सेंद्रिय” उत्पादन पोर्टफोलिओचा विस्तार करणार आहे. GCCMF चे व्यवस्थापकीय संचालक जयेन मेहता यांनी ‘द हिंदू बिझनेस लाइन’ला सांगितले की, आमच्याकडे आधीच २४ सेंद्रिय उत्पादने आहेत, ज्यात गव्हाचे पीठ, तांदूळ किंवा डाळी यांचा समावेश आहे. पुढील एका महिन्यात आम्ही सेंद्रिय साखर, गूळ आणि चहा यांसारखी आणखी उत्पादने बाजारात आणणार आहोत. दूध आणि दुग्धजन्य पदार्थांची विक्री करणाऱ्या अमूल ब्रँडने २०२२ मध्ये अमूल ऑरगॅनिक होल व्हीट फ्लोअर लाँच करून सेंद्रिय अन्न क्षेत्रात प्रवेश केला आहे.
तीन नवीन सेंद्रिय उत्पादनांची माहिती देताना मेहता म्हणाले की, सर्वांना रासायनिक खते आणि कीटकनाशकांपासून मुक्त अन्न खायचे आहे.जमिनीतील कार्बनचे प्रमाण कमी होत आहे.जर आपण सेंद्रिय खायला सुरुवात केली तर शेतकरी सेंद्रिय उत्पादन जास्त करतील आणि त्यासाठी बाजारपेठही असली पाहिजे.आम्ही उत्पादकांना सांगत आहोत की बाजारपेठ आहे, आम्ही ग्राहकांनाही त्याबद्दल सांगत आहोत.अमूल ब्रँड अंतर्गत, GCCMF आधीच सेंद्रिय चणा डाळ, मसूर डाळ, तूर डाळ, संपूर्ण हिरवा मूग, राजमा, काबुली चना, संपूर्ण उडीद, देसी चना, संपूर्ण गव्हाचे पीठ, बेसन, बासमती तांदूळ, सोनमसुरी तांदूळ इत्यादींची विक्री करत आहे.
