ઈતિહાસના સૌથી મોટા આર્થિક સંકટનો સામનો કરી રહેલા પાકિસ્તાનમાં હજુ પણ સ્થિતિ સુધરી રહી નથી. દેશમાં ગરીબોની સંખ્યા સતત વધી રહી છે. વિશ્વ બેંકે પાકિસ્તાનને ચેતવણી આપી છે કે ગત નાણાકીય વર્ષમાં પાકિસ્તાનમાં ગરીબીનો દર વધીને 39.4 ટકા થઈ ગયો છે. અત્યંત નબળી આર્થિક સ્થિતિને કારણે દેશના 1.25 કરોડથી વધુ લોકો ગરીબીમાં ધકેલાઈ ગયા છે.
9.5 કરોડ લોકો ગરીબી રેખા નીચે છે
પીટીઆઈના જણાવ્યા અનુસાર, વિશ્વ બેંક દ્વારા પાકિસ્તાનમાં ગરીબીના જે આંકડા રજૂ કરવામાં આવ્યા છે તેના પરથી અંદાજ લગાવી શકાય છે કે દેશવાસીઓની શું હાલત છે. પાકિસ્તાનમાં એક વર્ષમાં ગરીબી 34.2 ટકાથી વધીને 39.4 ટકા થઈ ગઈ છે. આ સાથે દેશમાં વધુ 1.25 કરોડ લોકો ગરીબી રેખા નીચે આવ્યા બાદ પાકિસ્તાનમાં ગરીબીથી પીડિત લોકોની સંખ્યા વધીને 9.5 કરોડ થઈ ગઈ છે.
પાકિસ્તાનનું આર્થિક મોડલ નિષ્ફળ!
વર્લ્ડ બેંકે પાકિસ્તાનમાં આવનારી સરકાર માટે તૈયાર કરવામાં આવેલ ડ્રાફ્ટ પોલિસીનું અનાવરણ કર્યું છે અને તેને સુધારવા માટે યોગ્ય પગલાં લેવાની સલાહ પણ આપી છે. વૈશ્વિક સંસ્થાએ કહ્યું છે કે દેશે નાણાકીય સ્થિરતા હાંસલ કરવા માટે તાત્કાલિક પગલાં લેવાની જરૂર છે. વિશ્વ બેંકના પાકિસ્તાન માટેના મુખ્ય અર્થશાસ્ત્રી ટોબિઆસ હકનું કહેવું છે કે પાકિસ્તાનનું આર્થિક મોડલ હવે ગરીબી ઘટાડતું નથી અને સમકક્ષ દેશોની સરખામણીએ અહીં જીવનધોરણ સતત ઘટી રહ્યું છે.
પાકિસ્તાનની વર્તમાન સ્થિતિ પર ચિંતા વ્યક્ત કરી
વિશ્વ બેંકે તેના અહેવાલમાં ચેતવણી આપી છે કે દેશને નાણાકીય સ્થિરતા માટે જે પગલાં લેવાની જરૂર છે તેમાં કૃષિ અને રિયલ એસ્ટેટ પર કર લાદવાની સાથે સાથે નકામા ખર્ચમાં કાપ મૂકવાનો સમાવેશ થાય છે. ટોબિઆસ હક તેમણે કહ્યું કે પાકિસ્તાન ગંભીર આર્થિક અને માનવ વિકાસ સંકટનો સામનો કરી રહ્યું છે અને તે એવા તબક્કે છે જ્યાં મોટા નીતિગત ફેરફારોની જરૂર છે. તેમણે કહ્યું કે વિશ્વ બેંક પાકિસ્તાનની આજની આર્થિક સ્થિતિને લઈને ખૂબ જ ચિંતિત છે.
દેશ ઝડપથી ગરીબીની જાળમાં ફસાઈ રહ્યો છે.
પાકિસ્તાન ઝડપથી ગરીબીની જાળમાં ફસાઈ રહ્યું છે, જે પહેલાથી જ આર્થિક રીતે ત્રસ્ત પાકિસ્તાન માટે મોટું સંકટ સર્જી શકે છે. નોંધનીય છે કે દેશમાં દરરોજ 3.65 યુએસ ડોલરની આવકના સ્તરને ગરીબી રેખા ગણવામાં આવે છે. વિશ્વ બેંકની નોંધ મુજબ, પાકિસ્તાન પાસે જીડીપીના 22 ટકા જેટલો કર વસૂલવાની ક્ષમતા છે, પરંતુ તેનો વર્તમાન ગુણોત્તર માત્ર 10.2 ટકા છે, જે અડધાથી વધુનો તફાવત દર્શાવે છે.
