ढाका : देशात साखरेचे दर प्रती किलो १३५ रुपयांवरून १२५-१२७ रुपयांवर आले आहेत. बांगलादेश शुगर डीलर्स बिझनेस असोसिएशनचे सहसचिव मोहम्मद अन्वर हुसैन चौधरी यांच्या म्हणण्यानुसार, घाऊक बाजारात साखरेच्या किमतीतही घसरण झाली आहे. बांगलादेश शुगर अँड फूड इंडस्ट्रीज कॉर्पोरेशन (बीएसएफआयसी) चे उत्पादन व्यवस्थापक मुहम्मद नूर-ए-आलम यांनी सांगितले की, देशातील साखरेची वार्षिक मागणी १.७ ते १.८ दशलक्ष टन आहे. त्यापैकी केवळ ३०,००० ते ३२,००० टन साखर कारखान्यांमध्ये उत्पादन होते. ते म्हणाले की, एकेकाळी देशात १७ साखर कारखाने होते. यातील दोन कारखान्यांचे १९९१ च्या सुमारास खाजगीकरण करण्यात आले. तर तोटा कमी करण्यासाठी २०२०-२१ या आर्थिक वर्षात आणखी सहा कारखान्यांमधील उत्पादन थांबवण्यात आले. सद्यस्थितीत देशात नऊ कारखाने सुरू आहेत.
दरम्यान, बांगलादेश शुगर डीलर्स बिझनेस असोसिएशनचे संयुक्त सचिव तथा एमडी अन्वर हुसैन चौधरी यांनी सांगितले की, बाजारात पाच कंपन्या साखर विकतात. यात एस. आलम ग्रुप, सिटी ग्रुप, मेघना ग्रुप, देशबंधू ग्रुप आणि इग्लू यांचा समावेश आहे. ते म्हणाले की, सध्या कंपन्यांच्या म्हणण्यानुसार चितगावमधील खातुंगंज येथील घाऊक बाजारात साखर ११८ ते १२० रुपये किलो दराने विकली जात आहे. त्याचवेळी कारखान्याच्या गेटवर साखर सरकारी दराने १२५ रुपयांप्रमाणे विकली जात आहे. मात्र, आंतरराष्ट्रीय बाजारात साखरेचे भावही कमी झाले आहेत. त्यामुळे देशातील भाव आणखी खाली यायला हवे होते, असे ते म्हणाले.
