विजयवाडा : आसनी चक्रीवादळाच्या प्रभावामुळे झालेल्या पावसाने आंध्र प्रदेशातील ३०,००० हेक्टरमधील शेती आणि बागायती पिकांवर परिणाम झाला आहे. पावसामुळे कापूस, ऊस, नाचणी यावर खूप परिणाम झाला आहे. प्रारंभिक माहितीनुसार, ३०,२२५ हेक्टर भात, ६०९५ हेक्टर मका, ३,८८३ हेक्टर हरभरा, ८७५ हेक्टर भुईमुग, ५८९ हेक्टर तिळ, २०० हेक्टर सूर्यफूल आणि १५० हेक्टर बंगाली हरभऱ्याला याचा फटका बसला आहे. राज्यात रब्बी हंगामात ८,२२,९९४ हेक्टरमध्ये विविध पिकांचे उत्पादन घेतले जाते. ६,२७,७१२ हेक्टरमधील पिकांची कापणी झाली आहे. तर अद्याप १,९५,२८२ हेक्टरमधील पिके शेतातच आहेत. राज्यात चक्रीवादळाने फटका बसलेल्या पिकांचे क्षेत्रफळ १६,९९७ हेक्टर आहे.
चक्रीवादळाने नुकसान झालेल्या भागातील पिकांची पाहणी कृषी अधिकाऱ्यांकडून सुरू आहे. आसनी चक्रीवादळामुळे पिकांच्या नुकसानीचा प्राथमिक अंदाज घेतला जात आहे. जर पाऊस थांबला आणि शेतांमधील पाणी कमी झाले तर पिकांचे नुकसान थांबून ती तग धरू शकतील. बागायतीबाबत प्राथमिक माहितीनुसार, १३,७२० हेक्टरमधील पिकांचे ३३ टक्केहून अधिक नुकसान झाले आहे. त्याचा २१,०४४ शेतकऱ्यांना फटका बसला आहे. सरकारला या शेतकऱ्यांना २८९९ लाख रुपयांची भरपाई द्यावी लागेल. राज्यातील बहुतांश जिल्ह्यातील १७८ मंडलांतील केळी, पपई, मिरची, आंबे, टोमॅटो, ताड, नारळ, सुपारीसह भाजीपाल्यासारख्या बागायती पिकांचे नुकसान झाले आहे.
