नवी दिल्ली : बनावट प्रयोगशाळा प्रमाणपत्रांचा वापर करून देशांतर्गत आणि आंतरराष्ट्रीय स्तरावर भेसळयुक्त दूध उत्पादनांचे वितरण करण्यात गुंतलेल्या एका खाजगी फर्मशी संबंधित मध्य प्रदेशातील नऊ ठिकाणी अंमलबजावणी संचालनालयाने (ईडी) बुधवारी छापे टाकले.भोपाळ, सिहोर आणि मुरैना या ठिकाणी बुधवारी सकाळी छापे टाकण्यात आले. ज्या ठिकाणी छापे टाकण्यात येत आहेत, ती ठिकाणे जयश्री गायत्री फूड प्रोडक्ट्स प्रायव्हेट लिमिटेडचे संचालक किशन मोदी, राजेंद्र प्रसाद मोदी आणि इतरांशी संबंधित आहेत.
या घटनेची माहिती असलेल्या ईडी अधिकाऱ्यानुसार, एजन्सीने ६३ खोटे प्रयोगशाळा अहवाल उघड केले आहेत. ज्यांचा वापर बहरीन, हाँगकाँग, सिंगापूर, ओमान, कतार आणि संयुक्त अरब अमिराती (यूएई) यासह अनेक देशांमध्ये निकृष्ट दूध उत्पादनांची निर्यात करण्यासाठी केला जात होता. जयश्री गायत्री फूड प्रोडक्ट्स प्रायव्हेट लिमिटेड आणि तिच्या संचालकांविरुद्ध ईडीची कारवाई अन्न भेसळ आणि फसव्या व्यापार पद्धतींवर मोठ्या कारवाईचा एक भाग आहे.
जयश्री गायत्री फूड प्रोडक्ट्स प्रायव्हेट लिमिटेड ची स्थापना २०१३ मध्ये मध्य प्रदेशातील भोपाळ येथे झाली. ही कंपनी दुग्धजन्य पदार्थांची एक प्रमुख उत्पादक आणि निर्यातदार आहे. “मिल्क मॅजिक” या ब्रँड नावाखाली कार्यरत असलेली कंपनी विविध प्रकारच्या उत्पादनांची ऑफर देते, ज्यामध्ये विविध प्रकारचे पनीर (जसे की फ्रोझन, मलई, ताजे आणि सेंद्रिय), मोझारेला चीज, तूप, खवा, पांढरे बटर आणि मार्जरीन यांचा समावेश आहे.३१ मार्च २०२२ रोजी संपणाऱ्या आर्थिक वर्षात, जयश्री गायत्री फूड प्रोडक्ट्सने १०० कोटी ते ५०० कोटी रुपयांच्या दरम्यान ऑपरेटिंग महसूल नोंदवला आहे. याच कालावधीत कंपनीच्या निव्वळ संपत्तीतही ५३.९४ टक्क्यांनी वाढ झाली आहे.
