नवी दिल्ली : साखरेपासून बनवलेले इथेनॉल हे मका किंवा तांदूळपेक्षा जास्त पाणी वापरते की नाही यावर दीर्घकाळ चाललेल्या वादाला पूर्णविराम देत, विविध विशेष संस्थांचा समावेश असलेल्या सरकारी अभ्यासातून असा निष्कर्ष काढण्यात आला आहे की,साखरेपासून तयार होणाऱ्या हरित इंधनामध्ये पाण्याचा कमीत कमी वापर केला जातो. या अभ्यासाच्या निष्कर्षांचा हवाला देत केंद्रीय अन्न सचिव संजीव चोप्रा यांनी सांगितले की, उसापासून तयार होणारे एक लिटर इथेनॉल ३,६३० लिटर पाणी वापरते, तर मक्यासाठी ४,६७० लिटर आणि तांदूळासाठी १०,७९० लिटर पाणी लागते.
साखर उत्पादकांची सर्वोच्च संस्था ISMA ने आयोजित केलेल्या जागतिक परिषदेत ते बोलत होते. साखर उद्योगासाठी ही एक चांगली बातमी आहे. त्याला धोरण म्हणून निश्चिती करता येईल. कारण इथेनॉलच्या मिश्रण कार्यक्रमाचा सर्वात मोठा फायदा साखर उत्पादकांना झाला आहे. कारण यामुळे कारखान्यांचे आर्थिक आरोग्य सुधारले आहे आणि शेतकऱ्यांची उसाची बिले वेळेवर मिळण्याची हमी यामुळे मिळाली आहे.
उसाचा रस आणि साखरेच्या पाकावर काही निर्बंध लादणारे पूर्वीचे निर्णय गेल्या महिन्यात काढून टाकण्यात आले होते, याचा संदर्भ देत सचिव चोप्रा म्हणाले की, साखरेवर आधारित इथेनॉल देशाच्या इथेनॉल क्षेत्रासाठी योग्य आहे की नाही यावर अनेक मते आहेत. आमचा नेहमीच विश्वास आहे की, साखर क्षेत्राच्या आर्थिक सुदृढतेसाठी आणि मजबूतीसाठी इथेनॉल मिश्रण कार्यक्रम महत्त्वाचा आहे. चोप्रा म्हणाले की, सरकारच्या इथेनॉल मिश्रण कार्यक्रमामुळे २०१८-१९ पासून साखर उद्योग स्वावलंबी झाला आहे. याआधी सरकार या क्षेत्राला आठ वर्षांत सुमारे १२,००० कोटी रुपयांची मोठी सबसिडी देत होते, हेही त्यांनी आठवले.
ते म्हणाले, सरकार इथेनॉलच्या किमती आणि साखरेची किमान विक्री किंमत (एमएसपी) वाढविण्याचा आणि साखर निर्यातीचा आढावा घेण्याचा विचार करत आहे. केंद्रीय अन्न आणि ग्राहक व्यवहार मंत्री प्रल्हाद जोशी यांनी गुरुवारी सांगितले की त्यांच्या मंत्रालयाने पेट्रोलमध्ये इथेनॉल मिश्रणाचे लक्ष्य २५ टक्क्यापर्यंत वाढविण्यासाठी रोडमॅप तयार करण्यासाठी नीती आयोगाला पत्र लिहिले आहे. मार्च २०२६ पर्यंत २० टक्के लक्ष्य गाठण्याचा सरकारला विश्वास आहे आणि एकूण इथेनॉल मिश्रण यावर्षी १४ टक्क्यांवर पोहोचले आहे.
