कर्नाल : ऊसासाठी गेल्या वर्षीचे राज्य समर्थन मूल्य (एसएपी) कायम ठेवण्याच्या हरियाणा सरकारच्या निर्णयामुळे नाराज शेतकऱ्यांनी गुरुवारी मुख्यमंत्री मनोहर लाल खट्टर, मंत्री आणि राज्यभरातील आमदारांच्या निवासस्थानांसमोर आंदोलन केले. भारतीय किसान युनियनच्या (चारुनी) नेतृत्वाखाली आंदोलन करणाऱ्या शेतकऱ्यांनी सरकारने एसएपी वाढवून ४५० रुपये प्रती क्विंटल करण्याची मागणी केली. पाच जानेवारी रोजी राज्यातील सर्व खासगी आणि सहकारी साखर कारखान्यांचे गाळप बंद पाडले जाईल अशी घोषणा त्यांनी केली. सरकारी अधिसूचनेनुसार राज्य सरकारने चालू गळीत हंगामासाठी प्रगत आणि नियमित प्रजातीसाठी अनुक्रमे ३६२ रुपये आणि ३५५ रुपये प्रती क्विंटल असा गेल्या वर्षीचा दर कायम ठेवला आहे.
कर्नालमध्ये आंदोलनकर्त्या शेतकऱ्यांचा एक गट मोठ्या प्रमाणावर पोलीस तैनात असताना प्रेम नगर विभागात पोहोचला आणि मुख्यमंत्र्यांच्या निवासस्थानाला त्यांनी घेराव घालण्याचा प्रयत्न केला. पोलिसांनी आंदोलनकर्त्यांना काही मीटर अंतरावरच रोखून धरले. आणि त्यानंतर त्यांनी रस्ते रोखून आंदोलन केले. नंतर ऊस घेवून जाणाऱ्या आंदोलनकर्त्या शेतकऱ्यांनी मुख्यमंत्र्यांचा पुतळा जाळला. चार जानेवारीपर्यंत मागण्या मान्य न केल्यास आंदोलन तीव्र करण्याचा इशारा दिला. बीकेयू (चारुनी) चे कर्नाल जिल्हाध्यक्ष अजय राणा यांनी सांगितले की, सरकारने आधीच एसएपीची घोषणा करण्यास एक महिना उशीर केला आहे. त्यामुळे ऊस बिले मिळण्यास उशीर झाला. आता सरकारने एमएसपी वाढीस नकार दिला आहे. त्यामुळे सरकारची सरकारविरोधी भूमिका स्पष्ट झाली आहे. जर सरकारने एसएपी वाढवून ४५० रुपये प्रती क्विंटल केली नाही, तर १० जानेवारी रोजी कर्नाल धान्य बाजारात राज्यस्तरीय शेतकरी महापंचायतीचे आयोजन केले जाईल. १२ जानेवारी रोजी राज्यातील साखर कारखाने बेमुदत गाळप बंद आंदोलन करतील.
