कर्नाल : ज्यांना उसाचा रस आवडतो, त्यांच्यासाठी एक आनंदाची बातमी आहे, आता वर्षभरात, पाहिजे तेव्हा उसाचा रस चाखता येणार आहे. ऊस संशोधन संस्थेच्या शास्त्रज्ञांनी उसाच्या रसाची पावडर तयार केली आहे. या पॅकेट बंद पावडरची वैधता उत्पादनाच्या तारखेपासून सहा महिने असेल. ही ज्यूस पावडर केवळ नैसर्गिकच नाही तर लिंबाच्या चवीमध्येही उपलब्ध असेल. उसाच्या रसाची पावडर पोषक तत्वांनी परिपूर्ण असून लवकरच बाजारात उपलब्ध होईल, असा दावा शास्त्रज्ञांनी केला आहे.
अमर उजालामध्ये प्रसिद्ध झालेल्या वृत्तानुसार, ऊस संशोधन संस्थेच्या कर्नाल प्रादेशिक केंद्राचे अध्यक्ष डॉ. एम. एल. छाबरा यांनी सांगितले की, ज्युस पावडरच्या पॅकेटमध्ये २०० मिली पाणी मिसळून मिसळून उसाचा ताजा रस तयार करता येतो. ऊस संशोधन संस्थेचे डॉ. के. हरी आणि इतर शास्त्रज्ञांनी एकत्रितपणे ही रस पावडर तयार केली आहे. शास्त्रज्ञांची टीम यावर बराच काळ काम करत होती. पुरेशा चाचण्याही करण्यात आल्या आहेत.
शास्त्रज्ञांनी उसाच्या रसातील पोषक तत्वांचीही पूर्ण काळजी घेतली असून त्यामुळे झटपट ऊर्जा मिळेल. सध्या ही पाकिटे ऑनलाइन शॉपिंग वेबसाइटवर विक्रीसाठी उपलब्ध करून दिली जाणार आहेत, मात्र संस्थेने खासगी कंपनीसोबत हे तंत्रज्ञान हस्तांतरित करण्याचा करार केला आहे. डॉ. छाबरा म्हणाले की, उसाच्या रसाची पावडर बनवून शेतकऱ्यांनाही मोठा फायदा होणार आहे. त्यामुळे उसाचा वापर आणि किंमत दोन्ही वाढेल.
