ભારતમાં અબજોપતિઓની સંખ્યા વધીને 284 થઈ ગઈ છે અને આ અબજોપતિઓની કુલ સંપત્તિ 98 લાખ કરોડ રૂપિયા છે. હુરુને તેના એક તાજેતરના અહેવાલમાં આ માહિતી આપી છે. 2025 માટે હુરુન ગ્લોબલ રિચ લિસ્ટ અનુસાર, છેલ્લા એક વર્ષમાં દેશના સૌથી ધનિક લોકોની કુલ સંપત્તિમાં 10 ટકાનો વધારો થયો છે.
2025 માટે હુરુન ગ્લોબલ રિચ લિસ્ટ અનુસાર, 284 અબજોપતિઓમાંથી 90 દેશની આર્થિક રાજધાની મુંબઈમાં રહે છે. વૈશ્વિક મંચ પર ભારત હજુ પણ મજબૂત સ્થાન ધરાવે છે, અબજોપતિઓની સંખ્યાની દ્રષ્ટિએ દેશ અમેરિકા અને ચીન પછી ત્રીજા ક્રમે છે. આ યાદીમાં અમેરિકા 870 અબજોપતિઓ સાથે ટોચ પર છે. હુરુન રિપોર્ટમાં એમ પણ કહેવામાં આવ્યું છે કે 175 ભારતીય અબજોપતિઓની સંપત્તિમાં વધારો થયો છે, જ્યારે 109 લોકોની સંપત્તિમાં કાં તો ઘટાડો થયો છે અથવા કોઈ ફેરફાર થયો નથી. ભારતીય અબજોપતિની સરેરાશ સંપત્તિ હવે 34,514 કરોડ રૂપિયા છે. વધુમાં, ભારતમાં 40 વર્ષથી ઓછી ઉંમરના સાત અબજોપતિઓ છે, જેમાંથી મોટાભાગના બેંગલુરુ અને મુંબઈમાં રહે છે.
વૈશ્વિક મોરચે, ટેસ્લા અને સ્પેસએક્સના સીઈઓ એલોન મસ્કે ગયા વર્ષે 189 બિલિયન ડોલરની કમાણી સાથે સંપત્તિમાં સૌથી મોટો વધારો નોંધાવ્યો હતો. અબજોપતિએ પાંચ વર્ષમાં ચોથી વખત વિશ્વના સૌથી ધનિક વ્યક્તિ તરીકેનો પોતાનો ખિતાબ જાળવી રાખ્યો અને $400 બિલિયનનો આંકડો પાર કરનાર પ્રથમ વ્યક્તિ બન્યા. એમેઝોનના સ્થાપક જેફ બેઝોસ $266 બિલિયનની નેટવર્થ સાથે બીજા સ્થાને છે. મેટાના AI અને ટેકનોલોજી અપગ્રેડમાં રોકાણકારોના મજબૂત વિશ્વાસને કારણે મેટાના CEO માર્ક ઝુકરબર્ગ પ્રથમ વખત ટોચના ત્રણમાં સ્થાન મેળવ્યું.
આ વર્ષની હુરુન યાદીમાં મનોરંજન, રમતગમત અને સોશિયલ મીડિયાના નામ પણ સામેલ છે. આમાં ગાયકો જય-ઝેડ, રીહાન્ના, ટેલર સ્વિફ્ટ અને પોલ મેકકાર્ટનીનો સમાવેશ થતો હતો. અબજોપતિ ક્લબમાં સ્થાન મેળવનાર રમતગમત હસ્તીઓમાં માઈકલ જોર્ડન, ટાઇગર વુડ્સ, ફ્લોયડ મેવેદર, લેબ્રોન જેમ્સ, ક્રિસ્ટિયાનો રોનાલ્ડો અને લિયોનેલ મેસ્સીનો સમાવેશ થાય છે.
