નવી દિલ્હી: ભારતીય હવામાન વિભાગ (IMD) એ આગામી ચોમાસા માટે અલ નીનોની શક્યતાને નકારી કાઢી છે પરંતુ આગળ ખૂબ જ ગરમ હવામાનની ચેતવણી આપી છે. નવીનતમ આગાહી એપ્રિલથી જૂન 2025 દરમિયાન દેશના ઘણા ભાગોમાં સામાન્ય કરતાં વધુ તાપમાન અને ગરમીના મોજાવાળા દિવસોની સંખ્યામાં વધારો દર્શાવે છે. અમને ચોમાસાની ઋતુ દરમિયાન અલ નીનોની સ્થિતિની અપેક્ષા નથી, એમ IMDના ડિરેક્ટર જનરલ ડૉ. મૃત્યુંજય મહાપાત્રાએ જણાવ્યું હતું. એપ્રિલ-જૂન સામાન્ય કરતાં વધુ ગરમ રહેશે અને ઘણા રાજ્યોમાં વધુ ગરમીના મોજા આવવાની શક્યતા છે.
ઓનલાઈન પ્રેસ કોન્ફરન્સને સંબોધતા, ડૉ. મહાપાત્રાએ ગરમ હવામાનની ઋતુ (એપ્રિલ થી જૂન 2025) માટે અપડેટેડ મોસમી આગાહી અને એપ્રિલ 2025 માટે વરસાદ અને તાપમાન અંગેની માસિક આગાહી વિશે વાત કરી. IMD ની આગાહી દર્શાવે છે કે, ભારતના મોટાભાગના ભાગોમાં મહત્તમ તાપમાન સામાન્ય કરતા વધારે રહેશે, પશ્ચિમ દ્વીપકલ્પીય ભારત, પૂર્વ-મધ્ય ભારત અને પૂર્વી ભારતના કેટલાક વિસ્તારો સિવાય, જ્યાં સામાન્ય તાપમાન રહેવાની સંભાવના છે. મોટાભાગના વિસ્તારોમાં લઘુત્તમ તાપમાન પણ સામાન્યથી ઉપર રહેવાની ધારણા છે.
ગરમીના દિવસોમાં નોંધપાત્ર વધારો થવાની ધારણા છે, ઘણા રાજ્યોમાં ભારે ગરમીની સ્થિતિનો અનુભવ થવાની સંભાવના છે. આઇએમડીની આગાહી મુજબ, રાજસ્થાન, ગુજરાત, હરિયાણા, પંજાબ, મધ્યપ્રદેશ, મહારાષ્ટ્ર, ઉત્તર પ્રદેશ, બિહાર, ઝારખંડ, પશ્ચિમ બંગાળ, ઓડિશા, છત્તીસગઢ, તેલંગાણા, આંધ્રપ્રદેશ અને ઉત્તર કર્ણાટક અને તમિલનાડુમાં એપ્રિલ-જૂનમાં વધુ ગરમી પડશે. એપ્રિલમાં ગુજરાત, મધ્યપ્રદેશ, મહારાષ્ટ્ર, પૂર્વ ઉત્તર પ્રદેશ, ઝારખંડ, પશ્ચિમ બંગાળ, ઓડિશા, છત્તીસગઢ, તેલંગાણા, આંધ્રપ્રદેશ અને ઉત્તર કર્ણાટકમાં પણ ગરમીનું મોજું આવવાની સંભાવના છે.
પશ્ચિમ ભારતમાં 10-15 માર્ચ દરમિયાન અને પૂર્વ-મધ્ય ભારતમાં 15વ18 માર્ચ દરમિયાન ગરમીના મોજા નોંધાયા હતા, જ્યારે ગુજરાત અને ઓડિશામાં સામાન્ય કરતાં વધુ ગરમીના મોજા નોંધાયા હતા. IMD ના ડેટા અનુસાર, 31 માર્ચ સુધી સમગ્ર ભારતમાં વરસાદ (20.1 મીમી) 1901 પછીનો 27મો સૌથી ઓછો અને 2001 પછીનો 10મો સૌથી ઓછો હતો. દક્ષિણ દ્વીપકલ્પીય ભારતમાં 20.7 મીમી વરસાદ નોંધાયો હતો, જે 1901 પછીનો 24મો સૌથી વધુ અને 2001 પછીનો 8મો સૌથી વધુ હતો. દક્ષિણ દ્વીપકલ્પીય ભારત અને પૂર્વ ભારતમાં માર્ચમાં સામાન્ય કરતાં વધુ વરસાદ પડ્યો હતો, જે IMD ના અગાઉના અંદાજો સાથે સુસંગત છે.
