ભારતમાં વાર્ષિક ધોરણે નિકાસમાં વધારો થયો છે. વાણિજ્ય મંત્રાલયના તાજેતરના ડેટા અનુસાર, મે મહિનામાં નિકાસ 15.46 ટકા વધીને $37.29 અબજ થઈ છે. જોકે, નિકાસ વૃદ્ધિ અગાઉના મહિનાની સરખામણીએ 7.2 ટકા ઘટી હતી. આ દરમિયાન વેપાર ખાધ પણ વધીને 23.33 અબજ ડોલર થઈ ગઈ છે.
દેશમાં વેપાર ખાધ રેકોર્ડ સ્તરે પહોંચી ગઈ છે. માહિતી અનુસાર મે મહિનામાં વેપાર ખાધ વધીને $23.33 બિલિયન થઈ ગઈ છે. ગયા વર્ષે મે મહિનામાં વેપાર ખાધ 6.52 અબજ ડોલર હતી. તેનું મુખ્ય કારણ એ હતું કે કોરોના મહામારીને કારણે ભારતે અન્ય દેશોમાંથી આયાત ઘટાડી દીધી હતી.
NDTVના અહેવાલ અનુસાર, આ આંકડાઓ અંગે ફેડરેશન ઓફ ઈન્ડિયન એક્સપોર્ટિંગ ઓર્ગેનાઈઝેશન (FIEO)ના મહાનિર્દેશક અજય સહાયે કહ્યું કે સોનાની આયાતમાં વધારાને કારણે વેપાર ખાધ વધી છે, જે ચિંતાનો વિષય છે. જ્યારે કોઈ દેશ તેની નિકાસ કરતાં વધુ આયાત કરે છે, ત્યારે તેને વેપાર ખાધનો સામનો કરવો પડે છે. મતલબ, તે દેશ તેના લોકોની માંગ પ્રમાણે પૂરતો માલ અને સેવાઓનું ઉત્પાદન કરી શકતો નથી, તેથી તેને અન્ય દેશોમાંથી આયાત કરવી પડે છે. મે મહિનામાં આયાત 56.14 ટકા વધીને 60.62 અબજ ડોલર થઈ છે. જે ગયા વર્ષના સમાન મહિનામાં $38.83 બિલિયન હતું.
મે 2022માં પેટ્રોલિયમ અને ક્રૂડ ઓઈલની આયાત 91.6 ટકા વધીને 18.14 અબજ ડોલર થઈ હતી. આ સમયગાળા દરમિયાન કોલસો, કોક અને બ્રિકેટ્સની આયાત વધીને $5.33 બિલિયન થઈ હતી જે ગયા વર્ષના સમાન મહિનામાં $2 બિલિયન હતી. તે જ સમયે, સોનાની આયાત વધીને $ 5.82 બિલિયન થઈ, જે મે 2021 માં $ 677 મિલિયન હતી.
દેશમાં મુખ્યત્વે પેટ્રોલિયમ ઉત્પાદન (52.71 ટકા), ઈલેક્ટ્રોનિક્સ ગુડ્સ (41.46 ટકા) અને ટેક્સટાઈલ સેક્ટર (22.94 ટકા)ના સારા પ્રદર્શનને કારણે દેશમાં નિકાસમાં વધારો થયો છે.
મંત્રાલયે કહ્યું કે, “દેશની કુલ નિકાસ નાણાકીય વર્ષ 2023ના પ્રથમ બે મહિનામાં એટલે કે એપ્રિલ અને મેમાં 22.26 ટકા વધીને $77.08 બિલિયન થઈ ગઈ છે. ગયા નાણાકીય વર્ષના પ્રથમ બે મહિનામાં નિકાસનો આંકડો $63.05 અબજ હતો.
બિઝનેસ સ્ટાન્ડર્ડના અહેવાલ મુજબ, એન્જિનિયરિંગ એક્સપોર્ટ પ્રમોશન કાઉન્સિલ ઈન્ડિયાના અધ્યક્ષ મહેશ દેસાઈએ જણાવ્યું હતું કે “વૈશ્વિક અવરોધો છતાં, ભારતીય એન્જિનિયરિંગની નિકાસ મે મહિનામાં $9.29 બિલિયન રહી હતી, જે પાછલા વર્ષની સરખામણીમાં 7.84 ટકાનો વધારો દર્શાવે છે. આ દર્શાવે છે કે આ ક્ષેત્ર મજબૂત છે અને પડકારોનો સામનો કરી શકે છે.”
એપ્રિલમાં, વર્લ્ડ ટ્રેડ ઓર્ગેનાઈઝેશન (WTO) એ રશિયા અને યુક્રેન વચ્ચે ચાલી રહેલા સંઘર્ષ અને ચીનમાં કોવિડ-19 પ્રતિબંધોને કારણે 2022 માટે તેના વૈશ્વિક વેપાર અનુમાનને તેના અગાઉના અંદાજ 4.7 ટકાથી ઘટાડીને 3 ટકા કર્યો હતો. WTOએ કહ્યું કે યુક્રેનમાં યુદ્ધની શરૂઆતથી વૈશ્વિક અર્થવ્યવસ્થાની સંભાવનાઓ અંધકારમય છે.
