ભારતીય રિઝર્વ બેંકના ગવર્નર શક્તિકાંત દાસે કહ્યું છે કે તેઓ ભારતના અર્થતંત્રની વૃદ્ધિ અને ફુગાવામાં ઘટાડાને લઈને સકારાત્મક છે. તેમને પૂરી આશા છે કે ભારત બંને મોરચે સારું પ્રદર્શન કરશે. શક્તિકાંત દાસે મુંબઈમાં એક કાર્યક્રમ દરમિયાન કહ્યું કે દેશ સાચી દિશામાં આગળ વધી રહ્યો છે. આપણો જીડીપી પણ મજબૂત સ્થિતિમાં છે. દેશના ગ્રામીણ વિસ્તારોમાં પણ વપરાશ વધી રહ્યો છે. અમને દરેક મોરચે સારા સમાચાર મળી રહ્યા છે.
શક્તિકાંત દાસે બોમ્બે ચેમ્બર ઓફ કોમર્સ એન્ડ ઇન્ડસ્ટ્રીની 188મી વાર્ષિક સામાન્ય સભા (AGM)ને સંબોધિત કરતા કહ્યું હતું કે ભારત તેના વિકાસના માર્ગમાં મોટું પરિવર્તન લાવવાની ધાર પર છે. ભારતનો જીડીપી સતત 8 ટકાની ઝડપે વધી રહ્યો છે. અમે વિશ્વની સૌથી મોટી અર્થવ્યવસ્થાઓને પાછળ છોડીને વિકાસની આ ગતિને સતત જાળવી રાખી છે.
આરબીઆઈ ગવર્નરે કહ્યું કે હાલમાં અમે મજબૂત વૃદ્ધિની ગતિ જોઈ રહ્યા છીએ. નાણાકીય વર્ષ 2023-24માં પણ અમે 8 ટકાથી વધુની ગતિ જાળવી રાખી છે. ગયા નાણાકીય વર્ષના ચોથા ક્વાર્ટરમાં પણ અમે અપેક્ષા કરતાં વધુ સારું પ્રદર્શન કર્યું હતું. હવે આ ગતિ નાણાકીય વર્ષ 2024-25ના પ્રથમ ત્રિમાસિક ગાળામાં પણ મજબૂત છે. હવે આરબીઆઈનો અંદાજ છે કે એપ્રિલ-જૂન ક્વાર્ટરમાં આર્થિક વૃદ્ધિ અમારા પોતાના અંદાજ કરતાં થોડી વધારે છે. ગ્રામીણ વિસ્તારોમાં વધતા વપરાશની પણ આના પર સકારાત્મક અસર પડી છે.
શક્તિકાંત દાસે કહ્યું કે ભારત જેવો મોટો દેશ માત્ર એક સેક્ટર પર નિર્ભર ન રહી શકે. આપણે સાથે મળીને ઉત્પાદન, સેવા, નિકાસ અને કૃષિનો વિકાસ કરવો પડશે. કૃષિ ક્ષેત્રે ઘણું કામ થયું છે. પરંતુ, હજુ ઘણું કરવાનું બાકી છે. આપણે સપ્લાય ચેઈન અને વેલ્યુ ચેઈન ફ્રેમવર્કને મજબૂત બનાવવું પડશે. RBI ગવર્નરે કહ્યું કે આઝાદી પછી સૌથી મોટો સુધારો GST છે. ઘણા દેશોની સરખામણીમાં આપણા દેશમાં GST ખૂબ જ સ્થિર છે. GST હેઠળ દર મહિને 1.7 ટ્રિલિયન રૂપિયા એકત્ર થઈ રહ્યા છે. તેમજ ધંધો પણ અનુકૂળ બન્યો છે.
