मंगळुरू : ब्रह्मवर साखर कारखान्यासमोर २२ फेब्रुवारीपासून बेमुदत धरणे आंदोलन करणाऱ्या उडुपी जिल्हा रायथा संघाने सरकारकडून कारवाईचे आश्वासन मिळाल्यानंतर आंदोलन मागे घेतले आहे. आंदोलकांनी सांगितले की, ब्रह्मवर येथील दक्षिण कन्नड सहकारी साखर कारखान्यातील भंगार विकणाऱ्या भ्रष्ट लोकांवर कारवाई करण्याचे आश्वासन राज्य सरकारने दिले आहे. कारखान्यातील अनियमिततेचा आरोप करत युनियनच्यावतीने जवळपास ५० दिवसांपासून आंदोलन सुरू होते असे माजी आमदार प्रतापचंद्र शेट्टी यांनी सांगितले.
ते म्हणाले, सरकारने शेतकऱ्यांच्या दिवसरात्र सुरू राहिलेल्या आंदोलनाला प्रतिसाद दिला आणि एक परिपत्रक जारी केले. उडुपीच्या उपायुक्त के. विद्या कुमारी आणि पोलिस अधीक्षक अरुण के. यांनी सरकारच्यावतीने आंदोलनस्थळी भेट दिली आणि शेतकऱ्यांना निषेध मागे घेण्याची विनंती केली. युनियन सदस्यांच्या मते, भ्रष्टाचारामुळे बंद पडलेल्या कारखान्याचे १४ कोटी रुपयांचे नुकसान झाले आहे. जानेवारी २०२२ ते जून २०२२ पर्यंत २१.९ कोटी रुपयांच्या भंगार वस्तू विकल्या गेल्या. परंतु ते आकडे ११.४ कोटी रुपये नोंदवण्यात आले, असा आरोपही त्यांनी केला. यामध्ये तांबे, पितळ, अॅल्युमिनियम आणि लोखंड होते, ज्यांचे मूल्य वेगवेगळे होते.
कारखान्यामध्ये ई-खरेदी प्रक्रिया राबवली जात नसल्याने आणि ई-वे बिल, वजनकाटे पावत्या आणि गेट पास असे नियम पाळले जात नसल्याने भंगार विक्रीत मोठ्या प्रमाणात अनियमितता झाल्याचा आरोप त्यांनी केला. १४ ऑक्टोबर २०२२ रोजी संबंधित विभागांकडे आणि ५ डिसेंबर २०२२ रोजी ब्रह्मवर पोलिसांकडे तक्रार दाखल करण्यात आली. मात्र, पोलिसांनी तक्रार स्वीकारली नाही म्हणून न्यायालयात खाजगी तक्रार दाखल करण्यात आली. यानंतर, न्यायालयाने ब्रह्मवर पोलिसांना या प्रकरणाची चौकशी करण्याचे निर्देश दिले. या प्रकरणात सरकारी अधिकाऱ्यांचीही नावे आरोपी म्हणून असल्याने, पोलिसांनी १४ ऑगस्ट २०२४ रोजी गृह विभागाला पत्र लिहून या प्रकरणाची चौकशी करण्याची परवानगी मागितली. तथापि, गृह विभागाने परवानगी दिली नाही, ज्यामुळे शेतकऱ्यांनी आंदोलन सुरू केले होते.
