નવી દિલ્હી: આમ આદમી પાર્ટીએ બુધવારે દિલ્હી મ્યુનિસિપલ કોર્પોરેશનની ચૂંટણીમાં બહુમતી મેળવીને ભારતીય જનતા પાર્ટી (BJP)ના 15 વર્ષના શાસનને ઉથલાવી દીધું હતું. ચૂંટણી પંચ દ્વારા શેર કરવામાં આવેલા તાજેતરના આંકડાઓ મુજબ, AAPએ અત્યાર સુધીમાં 250 માંથી 134 સીટ જીત્યા છે. ભાજપ, જે 2007 થી નાગરિક સંસ્થા પર શાસન કરી રહી છે, તે 104 બેઠકો જીતવામાં સફળ રહી. MCD ચૂંટણીમાં 15 વર્ષ બાદ ભાજપને હારનો સામનો કરવો પડ્યો. અંતિમ પરિણામોની જાહેરાત પહેલા રાષ્ટ્રીય રાજધાનીમાં આમ આદમી પાર્ટીના કાર્યાલયમાં ઉજવણી કરવામાં આવી હતી. પાર્ટીના કાર્યકર્તાઓ ઓફિસની સામે એકઠા થયા અને પાર્ટીના વડા અરવિંદ કેજરીવાલની પ્રશંસા કરતા ઉત્સાહ, નાચ્યા અને સૂત્રોચ્ચાર કર્યા.
આમ આદમી પાર્ટીના રાઘવ ચઢ્ઢાએ કહ્યું કે, ભાજપને આજે જવાબ મળી ગયો છે કે દિલ્હીના લોકો કામ કરનારાને વોટ આપે છે, બદનામ કરનારાને નહીં. ભાજપે તેના સાંસદ, મંત્રી, CBI અને EDને મેદાનમાં ઉતાર્યા, પરંતુ દિલ્હીની જનતાએ હજુ પણ AAPને મત આપ્યો. કેજરીવાલ પર લગાવવામાં આવેલા આરોપોનો જનતાએ ભાજપને જડબાતોડ જવાબ આપ્યો છે. રાઘવ ચઢ્ઢાએ કહ્યું, અમે દિલ્હીને વિશ્વનું સૌથી સુંદર શહેર બનાવીશું. રાષ્ટ્રીય રાજધાનીમાં 250 વોર્ડ માટે 4 ડિસેમ્બરે મતદાન થયું હતું, જેમાં લગભગ 50 ટકા મતદાન થયું હતું અને કુલ 1,349 ઉમેદવારો મેદાનમાં હતા. કેન્દ્રીય મંત્રીઓ, ભાજપ શાસિત રાજ્યોના મુખ્યમંત્રીઓ અને સાંસદો સહિતના ટોચના નેતાઓ સાથે દિલ્હીમાં AAP અને ભાજપ દ્વારા તીવ્ર પ્રચાર જોવા મળ્યો હતો અને જાહેર સમર્થન મેળવવા માટે સભાઓ કરી હતી.
