हैदराबाद / कोल्हापूर : जागतिक कमोडिटी क्षेत्रातील प्रमुख ओलाम ऍग्री महाराष्ट्रातील राजगोळी (ता. चंदगड, जि. कोल्हापूर) येथे मल्टी-इनपुट बायो-इथेनॉल युनिटमध्ये सुमारे ६० दशलक्ष डॉलरची गुंतवणूक करत आहे. ओलम सध्या राजगोळी येथे ४,००० टन प्रतिदिन गाळप क्षमता असलेला साखर कारखाना चालवत आहे. हैदराबादमध्ये समुन्नती एफपीओ कॉन्क्लेव्हमध्ये ओलम ॲग्रीचे ग्रुप सीएफओ मुथुकुमार नीलमणी यांनी बिजनेसलाइनला सांगितले की, “आम्ही बहु-इनपुट क्षमता असलेल्या डिस्टिलरीमध्ये सुमारे ६० दशलक्ष डॉलर्सची गुंतवणूक करत आहोत. याचा अर्थ ऊस उत्पादन कमी असल्यास, आम्ही त्याचे मक्क्यामध्ये रुपांतर करू शकतो.
यासाठी ओलम ऍग्रीची ऊस गाळप क्षमता दुप्पट करून ८,५०० टन प्रती दिन केली आहे. बायो-इथेनॉल युनिट पुढील वर्षी मार्चपर्यंत कार्यान्वित होईल. सिंगापूरमध्ये मुख्यालय असलेली ही जागतिक अन्न, खाद्य, फायबर आणि कृषी-उद्योग कंपनी ३० हून अधिक देशांमध्ये कार्यरत आहे. भारत आमच्यासाठी महत्त्वाची बाजारपेठ आहे आणि आम्ही तांदूळ, कापूस, डाळी, साखर आणि अलीकडे बायो-इथेनॉलचा व्यवहार करतो असे मुथुकुमार यांनी सांगितले.
ओलमच्या ग्रुप सीएफओंनी सांगितले की, कंपनी तांदूळ क्षेत्रातील शेतकरी उत्पादक संघटनेसोबत आपली भागीदारी वाढवत आहे. गेल्या वर्षी मध्य प्रदेशातील सुमारे ६,००० शेतकरी, प्रामुख्याने आदिवासींसोबत काम करताना त्याच्या प्रायोगिक उपक्रमांना यश मिळाले आहे. यावर्षी, कंपनीने आपला एफपीओ सहभाग तिप्पट केला आहे. सुमारे सहा एफपीओ सुमारे ११,००० शेतकऱ्यांपर्यंत पोहोचले आहेत. मुथुकुमार म्हणाले की, कंपनीला ऊस उद्योग आणि मक्यामध्येही याची पुनरावृत्ती करायची आहे. २०११ पासून आम्ही सुमारे २५,००० ऊस उत्पादक शेतकऱ्यांसोबत काम करत आहोत, असे मुथुकुमार यांनी सांगितले.
