मुंबई : महाराष्ट्राच्या मंत्रिमंडळाने बुधवारी ऊसतोड कामगारांच्या मुला-मुलींसाठी संत भगवानबाबा शासकीय वसतिगृह योजनेला मंजुरी दिली. या अंतर्गत राज्यातील स्थलांतरित ऊस तोडणी मजुरांच्या मुलांसाठी वसतिगृहे सुरू करण्यात येतील. या योजनेंतर्गत राज्यातील ४१ तालुक्यांमध्ये ८२ वसतिगृहे सुरू केली जाणार आहेत.
पहिल्या टप्प्यात बिड, अहमदनगर, जालना, नांदेड, परभणी, उस्मानाबाद, लातूर, औरंगाबाद, नाशिक आणि जळगाव या जिल्ह्यांमध्ये चालू शैक्षणिक वर्षासाठी मुले आणि मुलींसाठी स्वतंत्र १०-१० वसतिगृहे सुरू केली जाणार आहेत. जोपर्यंत वसतिगृहे बांधली जात नाहीत, तोपर्यंत भाडेतत्त्वावर इमारती घेऊन ही वसतिगृहे सुरू केली जाणार आहेत. याबाबत सामाजिक न्याय मंत्री धनंजय मुंडे यांनी सांगितले की, महाराष्ट्रात २३२ साखर कारखाने आहेत. त्या कारखान्यांसाठी ८ लाखांहून अधिक ऊस तोडणी मजूर काम करतात. त्यांच्या मुलांसाठी ही सुविधा निर्माण करण्यात येत आहे.
