कोइम्बतूर : इंडियन शुगर मिल्स असोसिएशन (इस्मा) ने भारतीय कृषी संशोधन परिषद-ऊस पैदास संस्थेसोबत उसाचे नवीन वाण विकसित करण्यासाठी सामंजस्य करारावर स्वाक्षरी केली आहे. या करारामुळे उसाची उत्पादन वाढ आणि साखरेची उच्च गुणवत्ता प्राप्त होण्यास मदत होणार आहे. पाच वर्षाच्या या प्रकल्पात देशभरातील 25 साखर कारखान्यांचा समावेश असेल आणि उष्णकटिबंधीय आणि उपोष्णकटिबंधीय प्रदेशांसाठी योग्य असलेले यशस्वी वाण दरवर्षी शेतकऱ्यांसाठी जाहीर केले जातील, असे ISMA अध्यक्ष आदित्य झुनझुनवाला यांनी ‘द हिंदू’ला सांगितले.
झुनझुनवाला म्हणाले की, या प्रकल्पासाठी 7.5 कोटी रुपये खर्च अपेक्षित आहे. आता, आमच्याकडे साखर आणि इथेनॉलचा देशांतर्गत आणि निर्यात वापराचा समतोल आहे. आम्ही सातत्याने साखर आणि इथेनॉलचे उत्पादन वाढवण्याचा प्रयत्न करत आहोत. सध्या प्रती हेक्टरी ऊस उत्पादन 80 टन आहे आणि या प्रकल्पाचे प्रती हेक्टरी 100 टन उत्पादनाचे उद्दिष्ट निश्चित करण्यात आले आहे. रिकवरी सध्या 10.85% असून उद्दिष्ट 11.5% आहे, असे ते म्हणाले. उसाचे उत्पादन वाढल्यास त्याचा शेतकऱ्यांना चांगला मोबदला मिळेल.
ऊस पैदास संस्थेच्या संचालिका जी. हेमाप्रभा म्हणाल्या की, या प्रकल्पामध्ये देशातील विविध प्रदेशात असलेल्या साखर कारखान्यांमधील विशिष्ट उसाच्या जातींचा अभ्यास केला जाणार आहे. उत्पादन आणि गुणवत्तेच्या क्षमतेसाठी 40 हून अधिक सुधारित जातींची चाचणी केली जाईल. इस्मा ने संस्थेसोबत आणखी एका प्रकल्पासाठी करार केला आहे, ज्याद्वारे ऊस मोठ्या प्रमाणात पाणी वापरतो की नाही हे निर्धारित केले जाईल. उसाची नेमकी पाण्याची आवश्यकता किती आहे, याचा अभ्यास केला जाईल. यामुळे शेतकऱ्यांना पाणी व्यवस्थापनात मदत होईल, असे झुनझुनवाला म्हणाले.
