हैदराबाद : देशातील अनेक कंपन्या इथेनॉल उत्पादनात गुंतवणूक करत असून आता त्यात नायरा एनर्जीचे (Nayara Energy) नावही सामील झाले आहे. ‘द इकॉनॉमिक टाईम्स’मध्ये प्रकाशित झालेल्या बातमीनुसार, कंपनीच्या एका वरिष्ठ अधिकाऱ्याने सांगितले की, Nayara Energy देशात दोन इथेनॉल उत्पादन प्रकल्प उभारण्यासाठी ६०० कोटी रुपयांची गुंतवणूक करण्याची योजना आखत आहे. यातील प्रत्येक प्लांटची दररोजची इथेनॉल उत्पादन क्षमता २०० किलोलिटर असेल.
आंध्र प्रदेशातील नायडूपेटा आणि मध्य प्रदेशातील बालाघाट येथे हे प्लांट स्थापित केले जातील आणि ते २०२६ पर्यंत कार्यान्वित होण्याची अपेक्षा आहे. कंपनी फीडस्टॉकसाठी तुटलेला तांदूळ आणि मका वापरेल. कंपनी दीर्घ कालावधीत, पाच इथेनॉल निर्मिती प्रकल्प उभारण्याची योजना आखत आहे. Nayara Energy चे कार्यकारी अध्यक्ष प्रसाद पणिक्कर (Prasad Panicker) म्हणाले की, इथेनॉल क्षेत्रासाठी आमच्याकडे मोठ्या योजना आहेत. आम्हाला २०२५ पर्यंत २० % इथेनॉल उत्पादन करायचे आहे. त्यामुळे आमचे १०० % सोर्सिंगचे ध्येय आहे. आमचे दीर्घकालीन लक्ष्य किमान पाच इथेनॉल प्लांट उभारण्याचे आहे. सुरुवातीला आम्ही दोन प्रकल्प उभारत आहोत.
गुजरातमधील वाडीनार येथे २० दशलक्ष मेट्रिक टन क्षमतेची तेल शुद्धीकरण कारखाना चालवणारी नायरा एनर्जी त्याच सुविधेवर पॉलीप्रॉपिलीन युनिट सुरू करणार आहे. कंपनी वार्षिक ४,५०,००० टन क्षमतेचे पेट्रोकेमिकल युनिट स्थापन करण्यासाठी ६,००० कोटी रुपयांची गुंतवणूक करत आहे. रिफायनरीची कार्यक्षमता आणि विश्वासार्हता सुधारण्यासाठी आधुनिकीकरणासाठी ४००० कोटी रुपयांची गुंतवणूक देखील करत आहे. २०२६ पर्यंत ही गुंतवणूक केली जाईल. पणिक्कर म्हणाले की, उत्पादन पोर्टफोलिओमध्ये विविधता आणणे आणि उच्च-वाढीच्या पेट्रोकेमिकल उद्योगाचे नेतृत्व करणे, तसेच देशांतर्गत ऊर्जेच्या गरजा पूर्ण करणे हे नायरा एनर्जीचे धेय्य आहे.
सस्टेनेबल एविएशन फ्यूल (Sustainable aviation fuel) या आणखी एका क्षेत्राबद्दल कंपनी सकारात्मक आहे. पणिक्कर म्हणाले की, शाश्वत विमान इंधन आर्थिकदृष्ट्या आकर्षक आहे आणि त्यात धोरणानुसार चालण्याची क्षमता आहे. फीडस्टॉक उपलब्ध असेल तर आम्हालाही या क्षेत्रात यायचे आहे. आपण SAF युनिटसह नेहमी रिफायनरी एकिकृत करू शकता, अन्यथा ते खूप महाग होईल. आपली रणनीती तयार करण्यासाठी कंपनी या विभागाचा अभ्यास करत आहे. ते म्हणाले की एक चांगली गोष्ट म्हणजे दोन आघाड्यांवर तंत्रज्ञान उपलब्ध आहे – SAF साठी इथेनॉल आणि SAF साठी वापरलेले स्वयंपाक तेल. पण या आघाड्यांवर अद्याप बरेच काही करायचे आहे.
