ગુરુવાર 23 મે 2024નું ટ્રેડિંગ સત્ર ભારતીય શેરબજાર માટે ઐતિહાસિક રહ્યું છે. BSE સેન્સેક્સ અને નેશનલ સ્ટોક એક્સચેન્જનો નિફ્ટી નવી ઐતિહાસિક ઊંચાઈએ પહોંચ્યો હતો, જ્યારે BSE પર લિસ્ટેડ શેરોનું માર્કેટ કેપ પણ પ્રથમ વખત રૂ. 420 લાખ કરોડને પાર કરી ગયું હતું. બેન્કિંગ સેક્ટરના શેરની જોરશોરથી ખરીદીને કારણે બજારનું સેન્ટિમેન્ટ ઊંચું જણાય છે. મિડકેપ શેરોમાં ખરીદીને કારણે નિફ્ટી મિડકેપ ઈન્ડેક્સ પણ નવી લાઈફ ટાઈમ હાઈ પર પહોંચી ગયો છે. આજના કારોબારના અંતે BSE સેન્સેક્સ લગભગ 1200 પોઈન્ટના ઉછાળા સાથે 75,418 પોઈન્ટ પર બંધ થયો હતો જ્યારે નેશનલ સ્ટોક એક્સચેન્જનો નિફ્ટી 370 પોઈન્ટના ઉછાળા સાથે 22,968 પોઈન્ટ પર બંધ થયો હતો.
માર્કેટ કેપ રૂ. 420 લાખ કરોડને પાર
શેરબજારમાં આવેલી આ ઐતિહાસિક તેજીના કારણે રોકાણકારોની સંપત્તિમાં ભારે વધારો થયો છે. BSE પર લિસ્ટેડ શેરોનું બજાર મૂલ્ય રૂ. 420.09 લાખ કરોડ પર બંધ થયું હતું, જે છેલ્લા ટ્રેડિંગ સેશનમાં રૂ. 415.94 લાખ કરોડ હતું. આજના સત્રમાં રોકાણકારોની સંપત્તિમાં રૂ. 4.15 લાખ કરોડનો વધારો જોવા મળ્યો હતો.
શેરબજારમાં ઉછાળાનું મુખ્ય કારણ બેંકિંગ શેરોમાં ખરીદી રહી છે. સરકારી અને ખાનગી બંને બેંકોના શેરમાં જોરદાર ખરીદારી જોવા મળી રહી છે. નિફ્ટી બેન્ક ઈન્ડેક્સ 986 પોઈન્ટ અથવા 2.06 ટકાના ઉછાળા સાથે 48,768 પોઈન્ટ પર બંધ થયો હતો. નિફ્ટી ઓટોમાં 525 પોઈન્ટ અને નિફ્ટી આઈટીમાં 429 પોઈન્ટનો ઉછાળો જોવા મળ્યો હતો. કન્ઝ્યુમર ડ્યુરેબલ્સ સેક્ટરના શેરમાં પણ જોરદાર ખરીદી જોવા મળી છે.
સેન્સેક્સના 30 શેરોમાંથી 27 શેર ઉછાળા સાથે અને 3 નુકસાન સાથે બંધ થયા હતા. મહિન્દ્રા એન્ડ મહિન્દ્રાના શેરે સેન્સેક્સ-નિફ્ટી રેકોર્ડ હાઈ લેવલ સુધી પહોંચવામાં ફાળો આપ્યો છે જે 3.51 ટકાના વધારા સાથે ટ્રેડ થઈ રહ્યો છે. આ સિવાય L&T 3.38 ટકા, એક્સિસ બેન્ક 3.30 ટકા, મારુતિ સુઝુકી 2.82 ટકા, અલ્ટ્રાટેક સિમેન્ટ 2.72 ટકા, ઇન્ડસઇન્ડ બેન્ક 2.29 ટકા, HDFC બેન્ક 2.22 ટકા, ભારતી એરટેલ 2.04 ટકાના વધારા સાથે બંધ થયા હતા. ઘટતા શેરોમાં સન ફાર્મા 2.94 ટકાના ઘટાડા સાથે, પાવર ગ્રીડ 1.86 ટકાના ઘટાડા સાથે, NTPC 0.43 ટકાના ઘટાડા સાથે બંધ રહ્યો હતો.
