सोलापूर : सहकार महर्षि कारखान्यास २०२४ चा देशातील सर्वोत्कृष्ट सहवीज निर्मिती प्रकल्प पुरस्कार को-जनरेशन असोसिएशन ऑफ इंडियाकडून प्रदान करण्यात आला. कारखान्याने यापूर्वीही राष्ट्रीय व राज्य पातळीवरील विविध पुरस्कार पटकावले आहेत, अशी माहिती कारखान्याचे कार्यकारी संचालक राजेंद्र चौगुले यांनी दिली. को-जनरेशन असोसिएशन ऑफ इंडियाचे अध्यक्ष तथा खा. शरद पवार यांच्या हस्ते पुरस्काराचे वितरण झाले. कारखान्याचे व्हा. चेअरमन शंकरराव माने-देशमुख, कार्यकारी संचालक राजेंद्र चौगुले व को जन मॅनेजर युवराज निंबाळकर यांनी स्वीकारला. यावेळी चिफ इंजिनिअर व फॅक्टरी मॅनेजर सूर्यकांत गोडसे, डेप्युटी को-जन मॅनेजर संतोष राजेभोसले व कार्यलक्षी संचालक रणजीत रणनवरे उपस्थित होते.
कारखान्याचे मार्गदर्शक संचालक, राज्याचे माजी उपमुख्यमंत्री विजयसिंह मोहिते-पाटील यांचे मार्गदर्शनाखाली व कारखान्याचे चेअरमन जयसिंह मोहिते-पाटील यांचे नेतृत्वाखाली कारखान्याची वाटचाल प्रगतीपथावर चालू आहे असे कार्यकारी संचालक चौगुले यांनी सांगितले. पुरस्कार वितरण कार्यक्रमाला सहकार मंत्री बाबासाहेब पाटील, राष्ट्रीय सहकारी साखर संघाचे अध्यक्ष हर्षवर्धन पाटील, को-जन असोसिएशनचे उपाध्यक्ष जयप्रकाश दांडेगावकर, महासंचालक संजय खताळ, राज्य सहकारी संघाचे अध्यक्ष पी. आर. पाटील आदींसह मान्यवर उपस्थित होते.
