हवाना : क्युबात साखरेचा तुटवडा असूनही पुढील हंगामात देशात केवळ १५ साखर कारखाने सुरु होण्याची शक्यता आहे. देशाच्या अर्थव्यवस्थेसाठी ऐतिहासिकदृष्ट्या महत्त्वाच्या असलेल्या साखर उद्योगाचे प्रश्न अनेक वर्षांनंतरही सुटलेले नाहीत. हवाना येथे ११ आणि १२ ऑक्टोबर रोजी झालेल्या अधिवेशनात उपराष्ट्रपती साल्वाडोर वाल्डेस मेसा यांनी साखर उद्योगातील कामगारांनी देशाच्या विकासात हातभार लावावा, असे आवाहन केले. ते म्हणाले की, कामगार वर्ग क्रांती अयशस्वी होऊ देणार नाही. तथापि, या क्षेत्राला स्पष्ट मर्यादा आहेत आणि गुंतवणूक आवश्यक आहे असे त्यांनी सूचित केले.
मंत्री परिषदेचे उपाध्यक्ष जॉर्ज लुईस टापिया फोन्सेका यांनी देशातील जवळपास निम्म्या साखर युनिट्सच्या खराब कामगिरीबद्दल चिंता व्यक्त केली. या क्षेत्राचे सखोल मूल्यांकन करणे आणि ते सुधारण्यासाठी ठोस कृती अंमलात आणणे आवश्यक आहे, यावर भर दिला. यंत्रसामग्री देखभाल, इंधनाची कमतरता आणि प्रतिकूल हवामान हे सध्याचे संकट आहे. सरकारने अनेक सहकारी संस्थांच्या कर्जाचे पुनर्गठन, उसाच्या किमती वाढवणे आणि सेवानिवृत्तांची काळजी घेण्याचे प्रयत्न केले असले तरी, या उपाययोजनांद्वारे अद्याप या क्षेत्राला वाचवण्यात यश आलेले नाही.
वाल्डेस मेसा आणि क्युबन कम्युनिस्ट पक्षाच्या इतर नेत्यांनी म्हटले आहे की, ऊस उत्पादन केवळ अर्थव्यवस्थेसाठीच नाही तर देशाची ओळख, परंपरेचा भाग म्हणूनदेखील महत्त्वाचे आहे. देशातील साखर कारखान्यांना २०२२-२३ मध्ये ३,५०,००० टन साखरेचे उत्पादन केले. १८९८ नंतरचे हे सर्वात कमी उत्पादन होते. क्युबा सरकारने ४,५५,१९८ टन साखर उत्पादनाचा अंदाज व्यक्त केला होता. परंतु हे उद्दिष्ट केवळ ७७ टक्केच साध्य झाले.
