डोडोमा : देशातील प्रमुख साखर उत्पादकांनी मेगा प्रकल्प सुरू केले आहेत, ज्यामुळे स्थानिक बाजारातील साखरेची मागणी पूर्ण होऊ शकेल आणि अतिरिक्त साठा निर्माण होऊ शकेल. टांझानिया शुगर प्रोड्युसर्स असोसिएशन (TSPA) मधील कारखानदारांनी सांगितले की, त्यांचे साखर कारखाने आणि ऊस शेतांच्या विस्तारामुळे २०२४-२५ आर्थिक वर्षाच्या अखेरीस देशात पुरेसे साखर उत्पादन होणार आहे. टीएसपीएमध्ये टांझानियामधील सुमारे पाच प्रमुख साखर उत्पादक कंपन्या समाविष्ट आहेत. यात किलोम्बेरो शुगर कंपनी लिमिटेड, बगामोयो शुगर लिमिटेड, कागेरा शुगर लिमिटेड, टीपीसी लिमिटेड आणि मॅटिबवा शुगर इस्टेट लिमिटेड यांचा समावेश आहे.
TSPA ने प्रसिद्धी पत्रकाद्वारे, सध्याची साखर उत्पादन स्थिती आणि साखर टंचाई याची कारणमीमांसा केली आहे. टंचाईमुळे किमतीत वाढ झाली आणि देशांतर्गत साखर पुरवठ्यावर परिणाम झाल्याचा दावा त्यांनी केला. स्थानिक साखर कारखाने सध्याच्या प्रतिवर्षी ४,९०,००० टनांच्या एकूण मागणीपैकी ९३ टक्के मागणी पूर्ण करतात. असोसिएशनने म्हटले आहे की, स्थानिक गुंतवणुकीचे संरक्षण करण्यासाठी आणि साखरेची अनियमित आयात रोखण्यासाठी कंपन्या आणि सरकार यांच्यातील सहकार्यामुळे स्थानिक साखर उत्पादन २०१५ मधील सुमारे ३,००,००० टनांवरून २०२३ मध्ये ४,६०,२०० टनापर्यंत पोहोचले.
TSPA ने सांगितले की, गुंतवणुकीचे अनुकूल वातावरण स्थानिक गुंतवणूकदारांना त्यांच्या साखर कारखान्यांच्या विस्तारासाठी अधिक भांडवल गुंतवणूक करण्यास सक्षम करत आहेत. सध्या सुरू असलेल्या महत्त्वाकांक्षी प्रकल्पांतर्गत २०२५-२६ या आर्थिक वर्षात साखर उत्पादन क्षमता ५,२८,००० ते ६,६३,००० टनांपर्यंत पोहोचेल. तत्पूर्वी, बॅगामोयो शुगर लिमिटेडचे संचालक, हुसेन सुफियान यांनी बागामोयो साखर उद्योगाचा ३०,००० टनवरून ६०,००० टनांपर्यंत साखर उत्पादन विस्तारीकरणाची माहिती दिली.
