હૈદરાબાદ: તેલંગાણા વિધાનસભા ચૂંટણીને હવે ગણતરીના દિવસો જ બાકી છે અને રાજ્યમાં રાજકીય પ્રચાર તેજ થઈ ગયો છે. કેન્દ્રીય ગૃહમંત્રી અમિત શાહે તેલંગાણાના જગીતાલ અને રંગારેડ્ડી જિલ્લામાં રોડ શો કર્યો. મંત્રી શાહે તેલંગાણામાં એક ચૂંટણી રેલીમાં રાજ્યમાં ત્રણ શુગર મિલો, મકાઈ પ્રોસેસિંગ અને ઇથેનોલ પ્લાન્ટને પુનર્જીવિત કરવાની જાહેરાત કરી હતી.
કેન્દ્રીય ગૃહ પ્રધાન અમિત શાહે કહ્યું કે, રાજ્યમાં ત્રણ શુગર મિલોને પુનર્જીવિત કરવાની જરૂર છે. બીજેપીને અહીં તેલંગાણામાં તેની સરકાર બનાવવા દો અને અમે ત્રણેય મિલોને પુનર્જીવિત કરીશું. નવા રચાયેલા હળદર બોર્ડ વિશે બોલતા કેન્દ્રીય મંત્રી શાહે કહ્યું કે, વડાપ્રધાન નરેન્દ્ર મોદીએ અહીંથી હળદર બોર્ડની જાહેરાત કરી છે. હવે માત્ર હળદરના ખેડૂતોને તેમની પેદાશની યોગ્ય કિંમત જ નહીં મળે, અમે તેના ઔષધીય મૂલ્ય પર સંશોધન માટે 200 કરોડ રૂપિયાનું કેન્દ્ર પણ બનાવીશું. તેમણે કહ્યું કે, રાજ્ય સરકાર તેની રચના કરી શકી હોત, પરંતુ વર્ષોથી સત્તામાં હોવા છતાં કેસીઆરે હળદર બોર્ડની રચના કરી ન હતી.
