हैदराबाद : जमीन पासबुकधारक प्रत्येक शेतकरी कुटुंबासाठी २ लाख रुपयांपर्यंतची शेती कर्जमाफी योजना लागू करण्यात आल्याची घोषणा तेलंगणाचे मुख्यमंत्री ए. रेवंत रेड्डी यांनी केली. मुख्यमंत्री रेड्डी यांनी सचिवालयात झालेल्या परिषदेत कर्जमाफी योजनेच्या अंमलबजावणी बाबत माहिती दिली. रेशनकार्डचा वापर केवळ कुटुंबाच्या ओळखीसाठी केला जातो. राज्यात एकूण शिधापत्रिकांची संख्या ९० लाख आहे, तर बँक कर्ज असलेल्या शेतकऱ्यांच्या खात्यांची संख्या ७० लाख आहे.
मुख्यमंत्री रेड्डी यांनी सांगितले की, राज्यातील ६.३६ लाख शेतकरी असे आहेत की ज्यांच्याकडे रेशनकार्ड नाही आणि त्यांनी शेतीसाठी कर्ज घेतले आहे. असे शेतकरीदेखील कर्जमाफीच्या लाभासाठी पात्र आहेत. रेशनकार्ड नसलेल्या शेतकऱ्यांशी योग्य व्यवहार केले जात नाहीत. याबाबत मुख्यमंत्र्यांनी जिल्हाधिकाऱ्यांना १८ जुलै रोजी सकाळी ११ वाजता बैठक घेण्याचे आदेश दिले. मुख्यमंत्री रेड्डी म्हणाले की, सरकारने कर्जमाफी योजनेसाठी जारी केलेली रक्कम केवळ शेतकऱ्यांसाठी वापरली जावी, वैयक्तिक किंवा इतर कर्जमाफीसाठी नाही. केंद्र सरकारने नुकतेच काही बँकांवर कृषी कर्जाचा निधी वळविल्याबाबत कारवाई केली होती.
मुख्यमंत्री रेड्डी यांनी जाहीर केले की, एक लाख रुपयांपर्यंतची कर्जमाफीची रक्कम १८ जुलै रोजी दुपारी ४ वाजता शेतकऱ्यांच्या खात्यात जमा केली जाईल. त्यांनी रायथू वेदिकामध्ये शेतकरी कर्जमाफी योजनेच्या लाभार्थ्यांची बैठक आयोजित करण्याची सूचना केली. आमदार आणि इतर लोकप्रतिनिधींनी यात सहभागी होऊन शेतकऱ्यांच्या आनंदात सहभागी व्हावे. केंद्रीय सचिवालयात दोन जिल्ह्यांसाठी (जुने जिल्हे) एक वरिष्ठ अधिकारी उपलब्ध करून दिला जाईल, जो कर्जमाफीबाबत जिल्हाधिकाऱ्यांनी उपस्थित केलेल्या कोणत्याही समस्या हाताळेल. या योजनेतील शंकांचे निरसन करेल आणि त्यांचे त्वरित निराकरण करेल.
