शहाजहांपूर : निगोही विभागातील पतीराजपूर येथे ऊस विभागाने छापा टाकून बेकायदेशीर ऊस खरेदी -विक्री प्रकरण उघडकीस आणले. यामुळे दलालांत खळबळ उडाली. काही शेतकऱ्यांकडून मिळालेल्या तक्रारीच्या आधारे गुप्तपणे हा छापा टाकण्यात आला. छापेमारीवेळी परिसरातील मध्यस्थांमध्ये घबराट पसरली. गेल्या अनेक दिवसांपासून या परिसरात बेकायदेशीरपणे ऊस खरेदी-विक्री सुरू आहे. वजन काट्यावरील अनियमिततेबाबत विभागाकडे तक्रारी येत होत्या. त्यामुळे जिल्हा ऊस अधिकारी जितेंद्र मिश्रा यांनी गांभीर्य दाखवत वजन व मापे विभागाचे निरीक्षक आलोक शर्मा आणि सहाय्यक साखर आयुक्त नीरज कुमार यांच्यासमवेत पतिराजपूर गावात छापा टाकला.
ऊस विभागाच्या अधिकाऱ्यांनी ट्रॅक्टर-ट्रॉलीतून नेत असलेल्या ऊस उत्पादक शेतकऱ्यांकडील स्लिपची तपासणी केली. शेतकऱ्यांच्या मोबाईलमध्ये स्लिपचा संदेश पाहूनच त्यांना जाण्यास परवानगी देण्यात आली. दुसरीकडे, वजन व मापे निरीक्षक आलोक शर्मा यांनी सांगितले की, त्यांनी वजनकाट्याची तपासणी केली. मिश्रीपूर येथील आनंद राठोड धर्मकाटा आणि निगोही येथील शांती धर्मकाट्याच्या व्यवस्थापकाला चलन बजावण्यात आले आहे. अन्य चार धर्मकाटा चालकांना नोटीस बजावण्यात आली आहे. अशा प्रकारची कारवाई सुरूच राहणार असल्याचे सहाय्यक साखर आयुक्त नीरज कुमार यांनी सांगितले. गोपनीय पद्धतीने संयुक्तपणे आकस्मिक तपासणी करण्यात आल्याचे जिल्हा ऊस अधिकारी जितेंद्र मिश्रा यांनी सांगितले.
